ՀՅԴ ԳՄ-ն երեկ նիստ է կայացել, որտեղ որոշվել է, որ ԱԺ պատգամավոր Վահան Հովհաննիսյանին ՀՅԴ խմբակցությունում կփոխարինի Միքայել Մանուկյանը: Այս մասին YerevanNews.am-ին հայտնեց ՀՅԴ խմբակցության պատգամավոր Արծվիկ Մինասյանը։
Արծվիկ Մինասյանը նշեց նաև, որ ըստ ՀՅԴ ցուցակի հենց Միքայել Մանուկյանն էր հաջորդ համարը:
Հիշեցնենք, որ Վահան Հովհաննիսյանը ՀՀ նախագահ Սերժ Սարգսյանի հրամանագրով նշանակվել է Գերմանիայում Հայաստանի արտակարգ և լիազոր դեսպան:
Միքայել Վաղինակի Մանուկյան
Ծնվել է 1967թ. ապրիլի 10-ին Երևանում:
1986թ. ավարտել է Երևանի Թերլեմեզյանի անվան գեղարվեստի ուսումնարանի գեղարվեստական ձևավորում ֆակուլտետը: Նկարիչ:
2006 թ. Ավարտել է Պետական մանկավարժական ինստիտուտը։
1986-1988թթ. ծառայել է խորհրդային բանակում: Ղարաբաղյան ազատամարտի սկզբից մասնակցել է պատերազմական գործողություններին:
1992-2002թթ. աշխատել է «Երկիր» օրաթերթում` որպես թղթակից, 2002թ.` ՀՅԴ Գերագույն մարմնում` կուսակցական կազմակերպական աշխատանքների պատասխանատու:
Պարգևատրվել է ԼՂՀ «Շուշիի ազատագրման համար», «Մարշալ Բաղրամյան» և ԼՂՀ «Մարտական ծառայության» մեդալներով:
2002-2007թթ. և 2010-ից մինչ օրս ՀՅԴ Գերագույն մարմնի նախագահն է:
2007թ. մայիսի 12-ին Ազգային ժողովի պատգամավոր է ընտրվել համամասնական ընտրակարգով ՀՅԴ կուսակցությունից::
Ամուսնացած է, ունի երեք երեխա: