«Ժամանակ» թերթի այսօրվա համարում կարդում ենք. «Երեկ երեկոյան Ծաղկաձորի «Գոլդեն փելես» հյուրանոցում ՀՀԿ-ն քեֆ էր կազմակերպել: Ենթադրվում էր, որ հինգշաբթի չկայացած ՀՀԿ ԳՄ նիստը երեկ կայանալու է Ծաղկաձորում: Բայց ինչպես ավելի ուշ պարզվեց՝ ՀՀԿ-ն իրար գլխի էր հավաքվել «մի կտոր հաց ուտելու» համար: «Մտիր ներս, սեղանը գցած ա»,- հուշում էին ՀՀԿ-ականները միմյանց:
«Ժամանակը» երեկ հյուրանոց ժամանող ՀՀԿ-ականներից փորձեց պարզել, թե հատկապես ինչ են նշում, սակայն նրանցից ոչ ոք չբացեց փակագծերը: «Ես չգիտեմ, ինձ ասել են՝ արի, ես էլ եկել եմ»,- ասաց ԱԺ պատգամավոր Աշոտ Աղաբաբյանը: Կապի և տրանսպորտի նախարար Գագիկ Բեգլարյանն էլ նշեց, թե ԳՄ նիստ է, բայց ինքը դեռ տեղյակ չէ, թե ինչ հարցեր են քննարկվում»: