Ինչպես բազմիցս հայտնել ենք, այս տարի ՀՀ գյուղատնտեսության ոլորտում իրավիճակը անորոշ էր: Մեծ քանակությամբ բերքը (խաղող, վարունգ, նուռ, ծաղկակաղամբ) փչացավ՝ իրացնել կամ մթերել չկարողանալու պատճառով: 

Միևնույն ժամանակ գյուղատնտեսության նախարար Սերգո Կարապետյանը հայտարարում էր. «Իրենք շատ բան են ասում, ոչ մի բան էլ չեն թափում, մթերումները շարունակվում են, արդեն ավարտին են մոտենում խաղողի մթերման աշխատանքները: Վայոց ձորի մարզում ընդամենը մի քանի տոննա խաղող է մնացել մթերելու, որը երեք-չորս օրվա ընթացքում կավարտվի: Ամեն օր մթերումները շարունակվում են, ոչ մի խնդիր չկա: Գիտեք ինչ՝ շատ տեղ շատ բան է փչանում, հիմա դա պետք է կապեք մեզ հե՞տ: Ի՞նչ ա նշանակում՝ փչանում ա, կարող ա լավ չեն պահում, փչանում ա»: 

Պատճառները պարզելու նպատակով YN.am-ը (YerevanNews.am-Երևան Նյուզ) խոսեց ԲՀԿ-ական պատգամավոր Վարդան Բոստանջյանի հետ:

Պարոն Բոստանջյան, ի վերջո, ի՞նչն էր պատճառը, որ այսքան բերք փչացավ:

- Նախորդ տարիների ընթացքում բերքատվության և բերքահավաքի կտրվածքով ՀՀ այդպիսի արդյունքներ չէր գրանցել, ինչպես ընթացիկ տարում: Եվ այսպիսի հարաբերականորեն առատության պայմաններում, ըստ էության, մենք չունենք համապատասխան ենթակառուցվածքներ՝ պահպանման հետ կապված, տեղափոխման հետ կապված, իրացման հետ կապված խնդիրները լուծելու համար: Մենք չկարողացանք ռացիոնալ ու արդյունավետ տեղաբաշխում և իրացում իրականացնեինք: Այ դրանով էր պայմանավորված:

Իսկ գյուղատնտեսության նախարարությունը նման կառույց չի հանդիսանո՞ւմ:

- Իհարկե, հանդիսանում է, բայց գյուղատնտեսության նախարարությանը ցանկացած միջոցառում, ցանկացած ծրագիր իրականացնելու համար ֆինանսական միջոցներ են պետք: Արի ու տես, որ ՀՀ այդ միջոցների կտրվածքով անընդհատ խրոնիկական լարվածություն է զգում, այդ թվում նաև գյուղատնտեսության նախարարությունը: Ու ոչ միայն իրենք, այլ բոլոր նախարարությունները: Դրա համար, գոյություն ունեցող ֆինանսական ռեսուրսների պարագայում նրանք կարողանում են անել այնքան, որքան որ արված է: Չհաշված վատ կառավարումը:

Այսինքն, միայն միջոցների պակասի պատճառով է...

Ես ասացի՝ չհաշված վատ կառավարումը:

Այս պարագայում միգուցե առավել նպատակահարմար է ուղղակի հրաժարվել գյուղատնտեսության նախարարությունից և ստեղծել համապատասխան կառույց, որը կզբաղվի գյուղացու մթերքի իրացման և մթերման աշխատանքները կազմակերպելով, քանի որ մի ամբողջ նախարարություն ի վիճակի չէ իրականացնել տվյալ գործառույթը (YN.am խմբագրություն):