ՀՀԿ երիտթևի ներկայացուցիչներն իրենց ղեկավար Կարեն Ավագյանի գլխավորությամբ հավաքվել էին Հայաստանում Ռուսաստանի դեսպանատան առաջ` հարգանքի տուրք մատուցելու երեկ Անկարայում սպանված ՌԴ դեսպան Անդրեյ Կառլովի հիշատակին։

Հիշեցնենք, որ երեկ Անկարայում ՌԴ դեսպանը ահաբեկչական գործողության զոհ էր դարձել. թուրք ոստիկանը նրա ուղղությամբ կրակել էր թիկունքից՝ այն պահին, երբ դեսպանը ելույթ էր ունենում «Ռուսաստանը թուրքերի աչքերով» խորագրով ցուցահանդեսի ընթացքում։

Այսօր Երևանում ՌԴ դեսպանատան մոտ հավաքվածները հարգել են սպանված դեսպանի հիշատակն ու աջակցություն հայտնել ՌԴ-ին։

Հավաքված երիտասարդները հայտարարում էին, որ դատապարտում են ցանկացած տեսակի ահաբեկչություն։

«Թուրքիան մխրճվում է ահաբեկչության մեջ, և այս ահաբեկչական ակտը, անշուշտ, ազդելու է ռուս-թուրքական հարաբերությունների վրա, քանի որ Թուրքիան այսօր բազմաթիվ խնդիրներ ունի բազմաթիվ երկրների հետ»,-ասաց երիտասարդ հանրապետականներից մեկը:

Նշենք, որ զուգահեռ զորակցության ակցիա է տեղի ունենում ՀՀ-ում Գերմանիայի դեսպանատան առաջ, որտեղ հավաքվածները հարգանքի տուրք են մատուցում երեկ Գերմանիայում ահաբեկիչ վարորդի կողմից սպանված 12 զոհերի հիշատակին:

Հիշեցնենք, որ երեկ Բեռլինում բեռնատարը մխրճվել էր Սուրբ ծննդյան տոնավաճառում հավաքված բազմության մեջ։ Գերմանիայի կանցլեր Անգելա Մերկելը տեղի ունեցածը որակել է որպես ահաբեկչություն։