Hraparak.am-ը գրում է.

«Դժվար թե ես այդ շքանշանների մասին ինչ-որ բան կարողանամ ասել, որովհետեւ ոչ գիտեմ այդ մարդկանց, ոչ գիտեմ նրանց արվեստը, ոչ գիտեմ՝ ինչի համար են նրանք ստացել շքանշաններ։ Այդ ամենը ինձ հետաքրքիր չի»,- սրանք կինոռեժիսոր, հասարակական գործիչ Տիգրան Խզմալյանի խոսքերն են, որը մեդալներ ստացածների մասին քիչ տեղեկություն ունի, այդ թեմային էլ չի հետեւել։ Իր կուսակցություն ստեղծելու վերաբերյալ մեր հարցադրմանը Խզմալյանը պատասխանեց․

- Երբ Միացյալ նահանգներում ընտրվեց Թրամփը, ես հաջորդ օրը գրեցի, որ Հայաստանում ընտրությունները կանխորոշված են։ Անմիջապես գիտակցեցի, որ Միացյալ Նահանգները մտնում Է մեկուսացման շրջան, դա համընկնում էր Բրիտանիայի մեկուսացմանը։ Այսինքն՝ այն, որ Արեւմուտքը ժամանակավոր հետ է քաշվում Հայաստանից եւ այլեւս ճնշում որոշ ժամանակ չի գործադրի Հայաստանի իշխանություններին եւ նրանց վրա, ովքեր կանգնած են Հայաստանի իշխանությունների հետեւում, արդեն իսկ հաջորդ օրը 2016 թ նոյեմբերի 9-ին ես գրեցի, հրապարակեցի կարծիքս, որ Հայաստանում ընտրություններն արդեն կայացել են եւ մասնակցել այդ ընտրությունների իմաստ չունի։ Ուստի ես դադարեցի կուսակցություն ստեղծելու գործունեությունը, եւ մենք մնացինք նախաձեռնության կարգավիճակում։ Այդ նախաձեռնությունը կա, կոչվում է «Եվրոպական ընտրություն», եւ շարունակում եմ այդ աշխատանքները այլ կերպ։ Ես փորձում եմ կարծիքներս, վերլուծություններս հասանելի դարձնել մարդկանց համացանցի միջոցով։

-Ձեզ գոհացնո՞ւմ է կազմված նոր ԱԺ-ն։

-Դա մեծ խոսակցություն է, բայց ես կարծում եմ, որ այս Ազգային Ժողովը խիստ ժամանակոր բնույթ ունի։ Դա ժամանակավոր է հետեւյալ պատճառներով. Հայաստանի անցումը խորհրդանական համակարգին, դա Ռուսաստանի պահանջն էր իմ խորին համոզմամբ։ Պուտինը ցանկանում է ոչնչացնել բոլոր խոչընդոտները «Խորհրդային միություն 2 նախագծի ճանապարհին։ Եվ անգամ Սարգսյանի պես
կախված եւ թույլ նախագահը կարողանում է իր պաշտոնում դիմակայել։ Եվրոասոցիացիայից դուրս գալուց հետո, Սերժ Սարգսյանի առջեւ անմիջապես դրվեց երկրորդ պահանջը, եւ նա այդ մասին ասել էր՝ ինչու հանկարծ մենք նախագահականից անցնում ենք խորհրդարանական կառավարման։ Հիմա կարծում եմ՝ Սերժ Սարգսյանը գիտակցում է, որ պուտինյան Ռուսաստանը գտնվում է ծանրագույն վիճակում եւ հոգեվարք է ապրում այդ երկիրը, փորձում է ժամանակ շահել, որից հետո այս խորհրդարանը, որը մի ոչ մի քաղաքական նշանակություն, առաքելություն, կարգավիճակ չունի, դա ուղղակի նախագահական աշխատակազմի որոշումները կնքող ֆորմալ դեկորացիա է, կփլվի։ Միգուցե, երբ մենք վերադառնանք քաղաքակրթական աշխարհի գիրկը, մենք այդ ժամանակ կունենանք նորմալ ընտրություններ։ Դա կարելի է անել միայն եվրոպական ճնշումների եւ վերահսկողության տակ։

-Դա ե՞րբ կլինի։

-Ոչ շուտ, երբ փլուզվի ռուսական գաղութատիրական իշխանությունը Հայաստանում։

-Կփլուզվի՞։

-Անպայման, մենք 100 տարվա մեջ երկու անգամ դա տեսել ենք՝ 1918 թ եւ 1991 թ։ Հետո մենք տեսանք, թե ինչպես Ռուսաստանը աշխատեց եւ 1999 թ հոկտեմբերի 27-ի պետական հեղաշրջման միջոցով վերականգնեց իր լիակատար վերահսկողությունը Հայաստանում։

-Պարոն Խզմալյան, դուք այժմ «Հիմանդիր խորհրդարանի» հետ կապ ունե՞ք, քանի որ նրանց հետ մասնակցում էիք ցույցերին, երթերին։

-Ես երբեք «Հիմնադիր խորհրդարանի» անդամ չեմ եղել, ես եղել եմ Նախախորհրդարանի հիմնադիրներից մեկը, սակայն 2014 թ քաղաքական տարաձայնություններ ունեցանք՝ կապված Ուկրաինայի, մեր Հայաստանի ընդդիմության եւ դիմության դերի վերաբերյալ։ Ես այդ ժամանակ պնդում էի, որ պետք է գնալ ազգային ազատագրական պայքարի, իմ ընկերները այլ տեսակետ ունեին, էնպես, որ ես դուրս եկա այնտեղից «Հիմնադիր խորհրդարանի» ստեղծվելուց առաջ։ Բայց հոգեբանորեն, շատ այլ առումներով ես կապված եմ իմ ընկերների հետ, թեեւ ես չէի կիսում իրենց այն նպատակը, ճանապարհը, որը իրենք էին առաջարկել։

Նյութի աղբյուրը ` Hraparak.am