Ֆուտբոլի Հայաստանի ազգային հավաքականը, ֆուտբոլիստների տրանսֆերային արժեքի հաշվարկով, հեղինակավոր «Տրանսֆերմարկետ» պարբերականի կողմից այս պահին գնահատված է 45.10 միլիոն եվրո: Այս ցուցանիշով մեր հավաքականը նախկին ԽՍՀՄ երկրների շարքում զբաղեցնում է երրորդ հորիզոնականը՝ զիջելով միայն Ռուսաստանին և Ուկրաինային: Վերջինի ազգային թիմը գնահատված է 104.7, իսկ Ռուսաստանը՝ 96 միլիոն եվրո:

Նկատենք, սակայն, որ մեր հավաքականում այսօր հանդես են գալիս ընդամենը երկու ֆուտբոլիստներ, որոնց տրանսֆերային արժեքը գերազանցում է միլիոնը: Խոսքը Սաուդյան Արաբիայի «Ալ Ֆուջեյրա» թիմում հանդես եկող Մարկոս Պիզելիի և, բնականաբար, «Մանչեսթեր Յունայթեդի» կիսապաշտպան Հենրիխ Մխիթարյանի մասին է:

Մեր հավաքականի ավագի տրանսֆերը այս պահին 37 միլիոն եվրո է, ինչը փաստում է, որ ՀՀ ընտրանին իր արժողությամբ համեմատաբար բարձր դիրքում է հենց դրա շնորհիվ: Պիզելիի տրանսֆերային արժեքը 1.1 միլիոն եվրո է: Մեր մյուս՝ մոտ 20 խաղացողների տրանսֆերային ընդհանուր արժեքը չի գերազանցում 8 միլիոնը:

Պորտուգալիայի «Մարիտիմուի» կիսապաշտպան Գևորգ Ղազարյանի տրանսֆերն այսօրվա դրությամբ ընդամենը 800 հազար եվրո է: Տրանսֆերային արժեքի ցուցանիշով Ղազարյանին հաջորդում են Իրանի «Էսթեղլալի» պաշտպան Հրայր Մկոյանը՝ 600 հազար եվրո, և նույն երկրի «Փադիդե» թիմի պաշտպան Վարազդատ Հարոյանը՝ 500 հազար եվրո: Մյուս բոլոր ֆուտբոլիստների տրանսֆերային գինը չի գերազանցում կես միլիոն եվրոն:

Հարևան Վրաստանը, որը աչքի է ընկել ֆուտբոլիստների արտահանելու ցուցանիշով, այսօր ունի միանգամից 9 ֆուտբոլիստներ, որոնց տրանսֆերային արժեքը գերազանցում է միլիոնը: Այդուհանդերձ, Վրաստանի ազգային հավաքականի ընդհանուր արժեքը 32.9 միլիոն եվրո է: Վրացի ամենաթանկ ֆուտբոլիստը Վարշավայի «Լեգիայի» կիսապաշտպան Վալերի Քազաիշվիլին է, որի տրանսֆերը 3.5 միլիոն է: Նա կես միլիոնով գերազանցում է Մոսկվայի «Սպարտակի» կիսապաշտպան Ջանո Անանիձեին և Կազանի «Ռուբինի» պաշտպան Սոլոմոն Կվիրկվելիային:

Հարևան երկրներից Ադրբեջանի ազգային հավաքականը զգալիորեն ետ է այս հաշվարկում: Ամենաթանկ ֆուտբոլիստը, որը կրում է Ադրբեջանի ազգային թիմի մարզաշապիկը, Աղդամի «Ղարաբաղի» պաշտպան Բադավի Հոսեյնովն է՝ 700 հազար եվրո: Այս երկրի ազգային հավաքականի ընդհանուր արժեքը 10.4 միլիոն եվրո է:

Հայաստանի ազգային հավաքականը իր արժեքով գերազանցում է նաև Իրանի ազգային թիմին, որը գնահատված է 35.10 միլիոն եվրո: Այս հավաքականի ամենաթանկ ֆուտբոլիստը «Ռոստովի» առաջատար Սերդար Ազմունն է՝ 13 միլիոն եվրո: Բացի Ազմունից, Իրանում խաղում են ևս 11 ֆուտբոլիստներ, որոնց տրանսֆերային գինը գերազանցում է մեկ միլիոն եվրոն:

Ֆուտբոլիստների արժողությամբ բավական բարձր դիրքում է Թուրքիան: Վերջինի ազգային հավաքականը գնահատված է 153.5 միլիոն եվրո: Ամենաթանկ ֆուտբոլիստը «Բարսելոնայի» կիսապաշտպան Արդա Թուրանն է՝ 28 միլիոն: Ի դեպ, Թուրքիայի հավաքականում խաղում է ընդամենը մեկ ֆուտբոլիստ, ում տրանսֆերային արժեքը չի գերազանցում միլիոնը:

Ի տարբերություն ազգային հավաքականի՝ ֆուտբոլիստների արժողությամբ չափազանց ցածր դիրքում է ՀՀ բարձրագույն խմբի առաջնությունը: Այն թիմերի և ֆուտբոլիստների արժեքային կտրվածքով գնահատված է ընդամենը 15.65 միլիոն եվրո:

Նշենք, որ ՀՀ առաջնությունում հանդես են գալիս ընդամենը 6 թիմեր: Այս հաշվարկում առաջատարը «Ալաշկերտն» է՝ 3.65 միլիոն, որին հաջորդում են Գյումրիի «Շիրակը»՝ 2.95, «Փյունիկը»՝ 2.73, «Բանանցը»՝ 2.68, «Գանձասարը»՝ 2.33, և «Արարատը»՝ 1.33 միլիոն եվրո: Հայաստանի առաջնությունում հանդես եկող ամենաթանկ ֆուտբոլիստը «Շիրակի» կիսապաշտպան Դավիթ Հակոբյանն է, ում տրանսֆերը գնահատված է 350 հազար եվրո:

Վրաստանի առաջնությունը, որտեղ 14 թիմեր են հանդես գալիս, գնահատված է 42.70 միլիոն եվրո, իսկ ահա Ադրբեջանի առաջնությունը՝ 45.13 միլիոն:

Համեմատության կարգով նշենք, որ ամենաթանկ առաջնությունն Անգլիայի Պրեմիեր լիգան է՝ 4.89 միլիարդ եվրո: Երկրորդ հորիզոնականում է իսպանական Լա լիգան՝ 3.59 միլիարդ, իսկ լավագույն եռյակը եզրափակում է 2.86 միլիարդով: Ռուսաստանի Պրեմիեր լիգան գնահատված է 690 միլիոն եվրո: