Երեւանի ավագանու «Բարեւ, Երեւան» խմբակցության ղեկավար Անահիտ Բախշյանն ահազանգ է ստացել, որ դասագրքերի բաշխման ու վարձավճարների հավաքագրման առնչությամբ մարզերից ահազանգեր են գալիս, որ մարզային կրթության վարչություններից դպրոցներին պարտադրում են իրացնել դպրոցների գրադարաններում եղած բոլոր դասագրքերն այն դեպքում, երբ աշակերտների թիվը պակասել է, կամ 5-րդ տարում դասագիրքը նույն արժեքով է տրվում աշակերտին, ինչ առաջին տարում:

«Կա ահազանգ այն մասին, որ սոցիալապես անապահով ընտանիքների երեխաներին միայն ԴՇՀ-ի (Դասագրքերի շրջանառու հիմնադրամի) հրատարակած դասագրքերն են տրվում անվճար, իսկ պետբյուջեով հրատարակված գրքերը՝ գումարով:

Տեղեկացված եմ նաեւ, որ ծնողները դասագրքերը հաճախ չեն ուզում վերցնել՝ ասելով, որ դրանք կայքում տեղադրված են, եւ երեխան օգտվում է կայքից, կամ երկու հոգով մեկ գիրք են ուզում վերցնել, որը դպրոցի գրադարանավարներին եւ տնօրեններին հաճախ ծանր կացության առջեւ է կանգնեցնում:

Կարծում եմ, որ ժամանակն է վերանայել Դասագրքերի շրջանառու հիմնադրամի գործունեությունը, եւ գտնել դասագրքերի օգտագործմանը նպաստող ավելի արդյունավետ ու փոխշահավետ մեխանիզմ»,- նշել է Բախշյանը: