Այսուհետ ‹‹Հայաստանը սեր է››, ‹‹Հանգստացիր Հայաստանում››, ‹‹Visit Armenia››, ‹‹Armenia Love›› խորագրերով և հեշթեգերով Հայաստանի ու Արցախի պատմամշակութային վայրերից լուսանկարներ համացանցում ավելի հաճախ կհանդիպեք։
Արշավի նախաձեռնողը ՀՀ վարչապետի տիկին Աննա Հակոբյանն է, նպատակը՝ ներկայացնել հայկական մշակույթը, զբոսաշրջային վայրերը, հոգևոր արժեքները, սնունդն ու ավանդույթները։ Արշավի առաջին կանգառը Արցախն է։
Ընտրվել է վեց վայր, որոնք ներկայացնում են Արցախի պատմությունը, հոգևոր, պատմամշակութային հարուստ ժառանգությունն ու բնության հրաշալիքները։
Դադիվանք վանական համալիր
‹‹Արմենպրես››-ի հետ զրույցում Աննա Հակոբյանի մամուլի խոսնակ Հասմիկ Հարությունյանը նշում է, որ նկարահանումների ընթացքում նոր գաղափարներ են առաջացել և Արցախը կրկին կներկայացնեն՝ արդեն նոր գույներով ու վայրերով։
Նիկոլ Դումանի տուն-թանգարան․ ‹‹Ժենգյալով հաց››-ի պատրաստման գործընթաց
‹‹Շատ խորհրդանշական է, որ արշավը մեկնարկում է հենց Արցախով, քանի որ յուրաքանչյուր հայի համար ‹‹ազատ Արցախ›› հասկացությունը ոգեշնչում և ուժ է տալիս։ Այնպիսի տպավորություն է, որ ցանկացած գործ, որ նախաձեռնում ես Արցախում՝ դատապարտված է հաղթանակի։ Արշավի մեկնարկի համար ընտրվել է վեց վայր՝ պայմանով, որ կրկին վերադառնալու ենք Արցախ և ներկայացնելու Արցախի յուրահատուկ շունչն ու էներգետիկան››,- ասաց Հասմիկ Հարությունյանը՝ նշելով, որ առաջին շարքով ներկայացվել է Արցախի Դադիվանք վանական համալիրը, Զուար գյուղում գտնվող ‹‹Տաք ջուր›› զբոսաշրջավայրը, Տիգրանակերտի թանգարանը, ‹‹Հունոտի կիրճ›› բնապատմական արգելոցը, Շուշիի Գորգերի թանգարանն ու Նիկոլ Դումանի տուն-թանգարանը։
Շուշիի Գորգերի թանգարան
‹‹Արշավի նպատակն է ներկայացնել Հայաստանն ու Արցախը որպես հանգստի լավագույն վայր, որտեղ հնարավոր է հանգստանալ բնության գրկում, այցելել տեսարժան վայրեր, վայելել համեղ խոհանոցը։ Հատկանշական է, որ Նիկոլ Դումանի տուն-թանգարանում վարչապետի տիկինը արցախյան խոհանոցի զարդը համարվող ‹‹Ժենգյալով հաց›› է թխել արցախցի Վալյա տատիկի հետ միասին։ Իսկ Շուշի գորգերի թանգարանի լուսանկարներում ներկայացված են արցախյան գորգերի ողջ գեղեցկությունը, պատմական արժեքն ու կարևորությունը››։
Շուշիի Գորգերի թանգարան
Հասմիկ Հարությունյանը նշում է, որ արշավը վաղուց էին ծրագրում իրականացնել, սակայն մեկնարկը համընկավ հենց համավարակի տարածման շրջանի հետ։ ‹‹Համավարակը մարտահրավեր է յուրաքանչյուր երկրի համար և մեծ վնաս է հասցնում հատկապես զբոսաշրջությանը։ Շատերը չգիտեն, թե մեր երկրում որքան գեղեցիկ վայրեր կան, պատմական արժեքներ կան։ Ցավոք, բայց մեզանից շատերը այդքան էլ լավ չեն ճանաչում մեր հայրենիքի թաքնված անկյունները։ Արշավի նպատակն է աջակցել զբոսաշրջությանը, որպեսզի մեր հայրենակիցներն իրենց հանգիստն ավելի շատ անցկացնեն հայրենիքում, իսկ սահմանները բացվելուց հետո նաև օտարերկրացի զբոսաշրջիկները վայելերն մեր երկրի գեղեցկությունն ու յուրահատկությունը››։
‹‹Տաք ջուր›› զբոսաշրջավայր
Հարությունյանը շեշտում է, որ ‹‹Հանգստացիր Հայաստանում›› արշավի շրջանակում էլ Աննա Հակոբյանը հավատարիմ է մնալու իր որդեգրած սկզբունքին և կրելու է բացառապես հայկական արտադրության հագուստ և զարդեր։
Տիգրանակերտի թանգարան
‹‹Այս արշավի ծրագրման ժամանակ մեզ նաև ոգեշնչեց մեր մեկ այլ նախաձեռնության հաջող ընթացքը։ Արդեն երկու տարի է վարչապետի տիկինը ‹‹Արտադրված է Հայաստանում››, ‹‹Կրենք հայկականը›› հեշթեգերով արշավ է իրականացնում և ներկայացնում հայ դիզայներների աշխատանքը։ Բազմաթիվ դիզայներներ նշել են, որ այս արշավը մեծ ազդեցություն է ունեցել․ այժմ հայկական բրենդներն ավելի հայտնի են և ավելի մեծ պահանջարկ ունեն››,-եզրափակեց Հասմիկ Հարությունյանը։
Տիգրանակերտի թանգարան
‹‹Հունոտի կիրճ›› բնապատմական արգելոցը
Նիկոլ Դումանի տուն-թանգարան ‹‹Ժենգյալով հաց››-ի պատրաստման գործընթաց
Շուշիի Գորգերի թանգարան
‹‹Տաք ջուր›› զբոսաշրջավայր
Լուսանկարները՝ Գևորգ Պերկուպերկյանի, Հայկ Մանուկյանի, Գայանե Գաբոյանի
Ոճաբան՝ Արմեն Գալյան
Վարսահարդարներ՝ Անահիտ Դադայան, Ռուզաննա Մուսաելյան (Արցախ)
Դիմահարդար՝ Անուշ Խանումյան (Արցախ)
Նիկոլ Փաշինյանն ու իշխանական թիմը այցելել են Հայոց ցեղասպանության հուշահամալիր (ֆոտո) 
