Lragir.am-ը գրում է. Արցախի հարցում բանակցային գործընթացում հայկական դիրքորոշման արդյունավետ հունի համար պետք է ընդամենը կարդալ Արցախի անկախության հռչակագիրը, հայկական երեք հեռուստաընկերությունների տված հարցազրույցում հայտարարեց Հայաստանի երկրորդ նախագահ Ռոբերտ Քոչարյանը, քննադատելով ներկայիս քաղաքականությունը: Ռոբերտ Քոչարյանը ներկայիս իշխանության քաղաքականությունն Արցախի հարցում բնորոշում էր անհասկանալի: Թերեւս դրանից էր նաեւ անհասկանալի նրա քննադատությունը, այն, թե ի վերջո ինչն ու ինչի համար է քննադատում Ռոբերտ Քոչարյանը:


Այդուհանդերձ, Արցախի հռչակագրին արված հղումով նա օգնեց բավականին որոշակիացնել իրավիճակը: Ըստ երկրորդ նախագահի, պետք է կարդալ Արցախի հռչակագիրը, այնտեղ ամեն ինչ ասված է, պետք է դա դարձնել հայկական դիրքորոշման հիմք եւ ամեն ինչ կընկնի տեղը:


Հիանալի է ասված, բայց մնում է իհարկե մի բաց: Խոսքն այն մասին է, թե Ռոբերտ Քոչարյանը որքանով է Արցախի անկախության հռչակագրին համահունչ համարում «Մադրիդյան սկզբունքները», որը նրա համաձայնությամբ բանակցության հիմք է դարձել 2007 թվականի վերջից: Թեեւ, մինչ այդ էլ եղած այսպես ասած բովանդակությունը առանձնապես, հիմնավորապես չի տարբերվել դրանից:

Այդուհանդերձ, երբ երկրորդ նախագահը որպես բանակցության հիմք հավանության էր արժանացնում «Մադրիդյան սկզբունքները», հիշու՞մ էր Ացախի անկախության հռչակագիրն ու համեմատում այդ սկզբունքների հետ: Որտե՞ղ էր նա տեսնում այդ սկզբունքների շուրջ բանակցության եւ Արցախի անկախության շահեկանությունը: Կարող էր տեսնել թերեւս մի տեղ՝ տարածքներ կարգավիճակի, այսինքն անկախության դիմաց: Ըստ այդմ, Ռոբերտ Քոչարյանը հնարավոր համարու՞մ էր Արցախի անկախության դիմաց տարածք հանձնելը:

Արցախի հարցում երկրորդ նախագահի դիրքորոշման հասկանալիության համար հարցերը իսկապես շատ են, սկսած, ընդ որում, այն փուլից, երբ նա շարունակեց Ալիեւի հետ բանակցությունը՝ չնայած այն բանին, որ Ադրբեջանի նախագահը պաշտոնապես կանգնեց մարդասպան կացնահար Սաֆարովի մեջքին:

Առավել մանրամասն՝ սկզբնաղբյուր կայքում