Նախագահ Ջո Բայդենը եւ առաջին տիկին Ջիլ Բայդենը գալիք Սուրբ Ծննդյան տոնի կապակցությամբ շնորհավորել են Վաշինգտոնի Ազգային մանկական հիվանդանոցի փոքրիկ պացիենտներին, ովքեր առողջական վիճակի պատճառով չեն կարողացել տուն գնալ՝ տոնը նշելու իրենց ընտանիքների հետ, հայտնում է Ամերիկայի ձայնը։

ԱՄՆ առաջին տիկնոջ Սուրբ Ծննդյան այցն այս հիվանդանոց վաղեմի ավանդույթ է, սակայն Ջո Բայդենի որոշումը միանալ իր կնոջն անսպասելի է եղել։ Սպիտակ տունը հայտնել է, որ գործող նախագահը Սուրբ Ծննդի նախօրեին պատմության մեջ առաջին անգամ այցելել է մանկական հիվանդանոց։


Սակայն այս ամենն առանց միջադեպերի չի անցել։ Ըստ AFP-ի՝ Բայդենը թրոլինգի է ենթարկվել։ Միջադեպը, որը արագ տարածվել է համացանցում, տեղի է ունեցել այն բանից հետո, երբ Բայդենը եւ առաջին տիկինը տեսակոնֆերանսի միջոցով խոսել են Հյուսիսային Ամերիկայի օդատիեզերական պաշտպանության հրամանատարության (NORAD) պաշտոնյաների հետ, ովքեր հետեւում են Սանտայի ճանապարհորդություններին ամբողջ աշխարհով մեկ:

Նախագահը պատասխանել է մի քանի ամերիկյան ընտանիքների զանգերին։ Մի տղամարդ ներկայացրել է որպես Ջարեդ՝ չորս երեխաների հայր: Բայդենը հակիրճ խոսել է նրա երեխաների հետ, հարցրել, թե ինչ նվերներ են նրանք ուզում Սուրբ Ծննդի համար եւ ասել, որ նրանք պետք է պառկեն քնելու մինչեւ կեսգիշեր: Եզրափակելով զրույցը՝ Բայդենը Ջարեդին մաղթել է «հրաշալի Սուրբ Ծնունդ»։

«Հուսով եմ, որ դուք նույնպես լավ Սուրբ Ծնունդ կանցկացնեք, Շնորհավոր Սուրբ Ծնունդ, եւ առաջ, Բրե՛նդոն»,-պատասխանել է Ջարեդը։

«Առաջ, Բրե՛նդոն»-ը ծածկագրված վիրավորանք է, որը դարձել է Դոնալդ Թրամփի կողմնակիցների բողոքի ձայնը՝ Սուրբ Ծննդյան նախօրեին Սպիտակ տանը տեղի ունեցած միջոցառման ժամանակ։

Ի պատասխան՝ Բայդենը հանգիստ պատասխանել է․ «Առաջ, Բրե՛նդոն, ես համաձայն եմ»։

Սակայն պարզ չէր, թե արդյոք նախագահը հասկացել է՝ ինչի մասին է խոսքը, թեեւ Ջիլ Բայդենը անհարմար ժպտացել է։