«Հայկական վերածնունդ» կուսակցության նախագահ Արթուր Բաղդասարյանն այսօր՝ մարտի 10-ին, Երեւանի Եվրոպական ակադեմիայում ընտրողների հետ հանդիպման ժամանակ սովորեցնում էր, թե ինչպես ընտրակաշառք վերցնել, բայց ընտրել մեկ այլ քաղաքական ուժի:

«Ժողովուրդ, եթե նույնիսկ ստիպված եք ընտրակաշառք վերցնել, գոնե ձեր քվեն տվեք այն քաղաքական ուժին, ում հավատում եք»,- ասաց Արթուր Բաղդասարյանը, սակայն մի քանի վայրկյան անց հրաժարվեց, թե նման բան է ասել:

Ներկաներից մեկը նշեց. «Պարոն Բաղդասարյան, ասում եք ընտրեք այն ուժին ում հավատում եք, բայց կան խոսակցություններ, որ ընտրակաշառք բաժանող քաղաքական ուժը մինչ գումար տալը, տալիս է բջջային հեռախոս, որով դու պետք է նկարես քո քվեաթերթիկը եւ համոզվելուց հետո, որ տվյալ կուսակցությունը կամ դաշինքն ես ընտրել, միայն դրանից հետո են գումար տալիս»:

Ի պատասխան Արթուր Բաղդասարյանն ասաց. «Ես նման բան չեմ ասել, թե ընտրակաշառքը վերցրեք եւ ընտրեք լրիվ այլ կուսակցության: Դուք ինձ սխալ եք հասկացել: Քվեարկության կարգն այնպիսին է, որ դուք կարող եք նկարել այն քվեաթերթիկը, որը ցանկանում եք: Ձեզ տալիս են 9 քվեաթերթիկ: Նախկին կառուսել կոչվածն այլեւ չի գործում, որովհետեւ ձեզ տալիս են 9 քվեաթերթիկ, դրանից ընտրում եք մեկը, դնում ծրարի մեջ եւ գցում քվեատուփը: Իսկ եթե ձեզ պետք է նկարել դրանցից մեկը, նկարեք այն եւ տարեք, ցույց տվեք կառաշք տվող մարդուն: Դուք կարող եք սա անել, բայց ես ուզում եմ, որ այս հոգեբանությունից մենք ազատվենք: Ամոթ է, պետք է հասկանանք, որ ապրիլի 2-ից հետո աշխարհը չի վերջանում: Հո մենք, վերջիվերջո, թաղի տղա չե՞նք ընտրում, ընտրում ենք երկրի քաղաքական բարձրագույն իշխանությունը՝ երկրի նախագահին, վարչապետին»:

Նրա խոսքով, հիմա քվեարկության վերահսկողությունն անհնար է. «Այնտեղ լիքը քվեաթերթիկներ են նետված եւ կարող ես հանգիստ նկարել: Էն որ փողը տալիս են, ասում են՝ էն 8 հատը դուրս կբերես, որ ուրիշ բան չքվեարկի: Բայց մարդու մտքին տեղ լինի… Ասում են՝ տեսախցիկ է դրված, նկարում են: Տեսախցիկը նկարում է ոչ թե դու ում քվեարկեցիր, այլ պրոցեսը: Հայաստանում փակ, գաղտնի քեվարկություն է եւ առաջին անգամ մեր երկրում գաղտնի քեվարկությունը խախտելն առաջացնում է քրեական պատասխանատվություն: Ամեն մեկդ պետք է իմանա, որ քվեախցում ինքը միայնակ է՝ իր խղճի հետ: Պա՞րզ է»,- մանրամասնեց Արթուր Բաղդասարյանը: