Հնարավոր է, որ Կարեն Կարապետյանը («Տաշիր գրուպ»-ի սեփականատեր Սամվել Կարապետյանի եղբայրը-խմբ) լինի նոր Ազգային ժողովի նախագահ: Այս մասին, այսօր՝ ապրիլի 10-ին, ԱԺ-ում լրագրողների հետ զրույցում նշել է խորհրդարանի գործող նախագահ Գալուստ Սահակյանը՝ հավելելով, որ կուսակցությունը դեռեւս չի քննարկել ԱԺ նախագահի հարցը:

«Երբ բոլորը ստանան մանդատները, այդ ժամանակ էլ կքննարկվի հարցը: Բոլորն էլ ինձ համար հավատարիմ մարդիկ են: Ովքեր էլ լինեն, մանավանդ նրանք, որոնք ավելի վաղուց են եկել, եւ կան, կարծում եմ հնարավոր կլինի, ինչու չէ, նաեւ Կարեն Կարապետյանը», - ընդգծեց նա:

Գալուստ Սահակյանի խոսքով, խորհրդարանի աշխատանքներն աստիճանաբար ավելի պարզ ու շիտակ են դառնում, ինչի ապացույցն են ընտրություններն ու դրան հաջորդած միջադեպերը. «Պատկերացրեք՝ տասը տարի առաջ ինչքան քաղաքական ուժեր էին ոտքի կանգնել ու ուզում էին գային խորհրդարան, ինչքան դժվար էր, ինչքան պայքարն ուրիշ էր, ինչքան մոմենտներ կային, որ անհասկանալի էին եւ մեզ, եւ ժողովրդին, այնպես որ գնալով պայմանները բարելավվում են»:

Անդրադառնալով նոր խորհրդարանում իր դերակատարմանը, Գալուստ Սահակյանը նշեց. «Ինձ մի տեսեք այդ պաշտոնում, ինձ տեսեք որպես Գալուստ Սահակյան: Չեմ սիրում այս մրցակցությունը, որ հայ ժողովրդի մեջ կա, բոլորն ուզում են ամեն ինչ դառնալ: Ցանկացած հայ, որը 3-րդ, 4-րդ կամ 5-րդ դասարան է գնացել, մի քիչ եթե խորանաք, բոլորը ուզում են թագավոր դառնալ եւ նախագահ»: