Պետական եկամուտների կոմիտեի քննչական վարչությունը 10 տարեկան է։ Այդ առիթով հանդիսավոր նիստ է կազմակերպվել գլխավոր դատախազության ներկայացուցիչների մասնակցությամբ: ՊԵԿ նախագահի և գլխավոր դատախազի հրամաններով վարչության աշխատակիցները շնորհակալագրեր և մեդալներ են ստացել:
Հարկային և մաքսային բնույթի հանցագործությունների քննության գործում մասնագիտացած վարչությունը ձևավորվել է հարկային պետական ծառայության և մաքսային պետական կոմիտեի կազմում 2007թ. հունիսի 1-ին ստեղծված քննչական բաժինների միավորման արդյունքում: «10 տարվա ընթացքում քննչական վարչությունն ավելի քան 3000 քրեական գործերով նախաքննություն է կատարել, որոնցից 537-ը մեղադրական եզրակացությամբ ուղարկվել են դատարան, իսկ պետական բյուջեին հասցված վնասի վերականգնման ուղղությամբ իրականացված աշխատանքների արդյունքում պետբյուջե է վերականգնվել շուրջ 35.5 մլրդ դրամ գումար»,-նշել է ՊԵԿ քննչական վարչության պետ Մարատ Դուրյանը: Նա ընդգծել է, որ վերջին շրջանում ավելի են ակտիվացել ՊԵԿ քննչական վարչության աշխատանքի արդյունավետության բարձրացմանն ուղղված գործընթացները։ Վարչությունը համալրվել է տեղեկատվական տեխնոլոգիաների մասնագետով, թարմացվել է նյութատեխնիկական բազան։ ՊԵԿ նախագահի տեղակալ Արմեն Սաքապետոյանը նկատել է, որ քննչական վարչությունը կապող օղակ է կոմիտեի և ՀՀ իրավապահ համակարգի միջև. «10 տարիների ընթացքում մեծ ջանք է ներդրվել կառույցի կայացման և մասնագետներով համալրման ուղղությամբ»:
Քննչական վարչության անձնակազմը շնորհակալություն է հայտնել ՊԵԿ մյուս ստորաբաժանումների, գլխավոր դատախազության, պետական այլ մարմինների ներկայացուցիչներին՝ համատեղ արդյունավետ աշխատանքի համար։ ՊԵԿ քննչական վարչության պետ Մարատ Դուրյանը վստահեցրել է, որ վարչությունը շարունակելու է պատվով կատարել իր առաքելությունը:
Զախարովա. Արևմուտքը Հայաստանը դիտարկում է որպես գործիք, որի հետ կխաղա, հետո կլքի 
Ծննդաբերությունից հետո Լուսինեի մոտ քաղցկեղ են հայտնաբերել 
