2007թ. Հայաստանի պետական պարտքը եղել է 14 տոկոս, այսօր 60 տոկոսի է հասնում, աղքատությունը՝ 12 տոկոս, այսօր 30 տոկոս է: Այս մասին այսօր՝ Հայաստանի 2018թ. բյուջեի քննարկմանն ասաց Աժ «Ծառուկյան» խմբակցության պատգամավոր Միքայել Մելքումյանը:
«Հայաստանի Հանրապետության տնտեսությանը պետք է ֆունդամենտալ գնահատական տանք: Մենք մեկ օրում չէ, որ հասել ենք այս վիճակին, անցած տարվա համեմատ որեւէ փոփոխություն չկա, ընդամենը ծրագրեր, ցանկություններ են»,-ասաց նա:
Միքայել Մելքումյանը նշեց, որ պետք է կարողանալ կանխորոշում տալ՝ ինչու Հայաստան ներդրումներ չեն գալիս:
«Տնտեսական իշխանավորները գները գցելով ներկրմամբ զբաղվողներին դուրս են շպրտում շուկաներից, չէ որ մարդը բիզնեսով չի կարա զբաղվի՝ տարիներով վնաս կրելով: Ինչ անենք, այդ թվերի համար ծափահարե՞նք ձեզ: Մոնոպոլացված տնտեսական կառույցներ կան, դրանք քաղաքական ինստիտուտներին չպետք է թելադրեն, բայց թելադրում են այսօր»,-ասաց նա:
Նշենք, որ Ազգային ժողովում այսօր շարունակում է վեցերորդ գումարման երկրորդ նստաշրջանը. օրակարգում 2018 թվականի պետական բյուջեի նախագիծն է:
2018 թվականի բյուջեի քննարկումները մեկնարկել են նախօրեին: