2018 թվականի Ամանորի եւ Սուրբ Ծննդյան հանգստյան օրերը չեն կրճատվի։ Այս մասին NEWS.am-ի հետ զրույցում հայտնեց վարչապետի մամուլի քարտուղար Արամ Արարատյանը։
Նրա փոխանցմամբ, Կառավարությունում այժմ քննարկվում է «Հայաստանի Հանրապետության տոների եւ հիշատակի օրերի մասին» օրենքում փոփոխությունների նախաձեռնությամբ հանդես գալու հարցը, որով 2019 թվականից սկսած Ամանորի տոները հնարավոր է կրճատվեն, սակայն դա չի վերաբերելու 2018 թվականին:
Հիշեցնենք, որ կառավարության 2017 թ․ առաջին նիստի ժամանակ վարչապետ Կարեն Կարապետյանն այն համոզմունք էր հայտնել, որ մեր երկրում առկա տնտեսական իրավիճակում երկար հանգստանալը ճոխություն է:
Նշենք, որ «Տոների եվ հիշատակի օրերի մասին» ՀՀ օրենքի 1-ին հոդվածի համաձայն՝ Ամանորը եւ Ծննդյան տոները նշվում են դեկտեմբերի 31-ից հունվարի 2-ը ներառյալ (Ամանոր), հունվարի 3-ին, 4-ին եւ 5-ին (նախածննդյան տոներ) եւ հունվարի 6-ին (Uուրբ Ծնունդ եւ Հայտնություն) որպես ոչ աշխատանքային oրեր: Իսկ նույն օրենքում 2009 թ․ կատարված փոփոխության համաձայն՝ Uուրբ Ծննդյան ու Հայտնության տոնին հաջորդող` Մեռելոց հիշատակի օրը նշվում է հունվարի 7-ին որպես ոչ աշխատանքային oր»:
Ստացվում է, որ այս տարի ոչ աշխատանքային օրերը կսկսվեն դեկտեմբերի 30-ից, քանի որ այն շաբաթ օր է, իսկ 2018-ի առաջին աշխատանքային օրը կլինի հունվարի 8-ը:
Հենրիխ Մխիթարյան․ Անմոռանալի մրցաշրջան է 
