Կեմերովոյում բնակվող գործարար Իգոր Վոստրիկովը, ով առևտրի կենտրոնում հրդեհի հետևանքով կորցրել է երեք երեխաներին, կնոջն ու քրոջը, ասել է, որ կինոթատրոնի դռները դրսից են փակված եղել։

«Լենան այնտեղից զանգահարեց՝ բղավելով՝ օգնեցե՛ք, փրկե՛ք, մեզ փակել են այստեղ։ Նրանք չեն կարողացել դռները բացել։ Մայրս անմիջապես այստեղ եկավ, չորրորդ հարկ բարձրացավ։ Աղաչում էր, որ ինչ-որ մեկը բացի այդ կինոթատրոնի դռները։ Բայց ոչ ոք օգնության չեկավ։ Երեք կինոսրահներից մեկի դռները բաց էին, այնտեղ բոլորը փրկվել են»,- «Կոմսոմոլսկայա պրավդա»-ի հետ հարցազրույցում ասել է գործարարը։

 

Գործարարը մշտապես գտնվում է քաղաքի դիահերձարաններից մեկի մերձակայքում՝ հույս ունենալով, որ իրեն կկանչեն։ Սակայն մարմինների մեծամասնությունն այնքան այրված է, որ ճանաչել հնարավոր չէ։ Նա նաև հավելել է, որ ԱԻՆ-ի աշխատակիցները, բացի նրանից, որ պատրաստված չէին, այլև չէին արձագանքում օգնության խնդրանքներին։

Իգորը նշում է, որ տուժածների հաշվարկով՝ ողբերգության օրը շուրջ 350 մարդ է զոհվել։