Սուրբ Հարության տոնին ընդառաջ կտրուկ ավելանում են հավկիթի սպառման ծավալները, ինչի կապակցությամբ եւս մեկ անգամ ցանկանում ենք տեղեկացնել, որ համաձայն ՀՀ Կառավարության 2011 թ.-ի N 1438-ն «Ձվի եւ ձվամթերքի տեխնիկական կանոնակարգը հաստատելու մասին» որոշման չի թույլատրվում այն հավկիթների իրացումը, որոնք չունեն անվտանգությունը եւ ծագումը հաստատող փաստաթուղթ, թերի է կամ լրացած պիտանելիության ժամկետը կամ բացակայում է մակնշումը (բացառությամբ շուկաներում վաճառվող գյուղատնտեսական արտադրանք հանդիսացող հավկիթների, որոնց իրացման համար անհրաժեշտ է միայն անասնաբուժասանիտարական փորձաքննության կտրոն):

Հավկիթների մակնշման մեջ պետք է տեսանելի լինեն հավկիթի տեսակը, կարգը, արտադրության օրն ու պիտանելիության ժամկետը: Կախված հավկիթի տեսակից ու կարգից պիտանելիության ժամկետը տարբեր է. Ա դասի կամ թարմ հավկիթի «Էքստրա» տեսակի պիտանելիության ժամկետը 7 օր է, իսկ 1-ին տեսակի հավկիթներինը` 25 օր` օդի ջերմաստիճանի 00-200 C եւ 85-88% հարաբերական խոնավության պայմաններում:

Հավկիթի թարմությունը կարելի է որոշել ինչպես գնելիս, այնպես էլ արդեն տանը: Գնելիս պետք է ուշադրություն դարձնել վերջինիս գույնին եւ կճեպին: Գույնը պետք է լինի սպիտակ, իսկ եթե կաթնագույն է, դեղնավուն կամ մոխրագույն, նշանակում է այն այլեւս թարմ չէ: Կճեպը պետք է լինի չաղտոտված, հարթ եւ առանց ճաքերի: Թարմ չլինելու մասին է վկայում է նաեւ հաստ կճեպի վրա արտահայտված ցանի առկայությունը: Հավկիթը չպետք է նաեւ կոտրված կամ ճաքած լինի, քանի որ կճեպի ճաքերից եւ կոտրվածքներից մանրէները կարող են ներթափանցել հավկիթի մեջ:

Իսկ եթե արդեն գնել եք հավկիթ, սակայն այնուամենայնիվ կասկածում եք վերջինիս թարմության մեջ, ապա այն դրեք ջրով լի տարայի մեջ, եթե ընկղմվեց ջրի մեջ, ուրեմն թարմ է, եթե ոչ` մի օգտագործեք այն: Թարմությունը կարելի է որոշել նաեւ պարզապես թույլ թափահարելով ձուն, եթե զգացվեց շատ թույլ շարժում, ուրեմն այն թարմ է, իսկ եթե շարժման ձայն լսվեց` թարմ չէ: Բացի այդ կարելի է ջարդել ձուն, եթե դեղնուցը չխառնվեց սպիտակուցին, ուրեմն վերջինս թարմ է:

Հաշվի առնելով այն հանգամանքը, որ շատերը ոչ միշտ են առաջին իսկ օրը սպառում նախապես եփված հավկիթները, խորհուրդ է տրվում չսպառելու պարագայում հավկիթը եփելուց հետո պահպանել սառնարանային պայմաններում եւ օգտագործել 72 ժամվա ընթացքում:

Շնորհավորելով գալիք տոնը` սպառողներին հորդորում ենք հետեւել խորհուրդներին, իսկ վերը նշված պահանջների խախտումներ հայտնաբերելիս խնդրում ենք տեղեկացնել Կազմակերպությանը` զանգահարելով +37410 430930