Ի՞նչ է հայտնաբերվել «Օշականցի Գեւորիկի» եղբորորդու մոտ. նոր մանրամասներ

Ոստիկանությունը մանրամասներ է հայտնել նախօրեին Վանաձորում 10 անձի բերման ենթարկվելու վերաբերյալ։

«Զինանոց-2018» օպերատիվ համալիր կանխարգելիչ միջոցառման 2-րդ փուլի շրջանակներում ոստիկանության Բազումի բաժնի ծառայողները, օպերատիվ տվյալներն իրացնելիս, թմրանյութ, զենք-զինամթերք ձեռք բերելու և պահելու կասկածանքով, նոյեմբերի 12-ին, ժամը 19.00-ին, Լոռվա խճուղի 1/Ա հասցեում գործող ռեստորանի մոտից բաժին բերման են ենթարկել 1989 թ. ծնված Գ. Հ.-ին, 1986 թ. ծնված Ա. Ղ.-ին, 1998 թ. ծնված Դ. Հ.-ին, 1989 թ. ծնված Դ. Խ.-ին, 1990 թ. ծնված Ա. Ա.-ին, 1988 թ. ծնված Ն. Օ.-ին, 1994 թ. ծնված Ն. Հ.-ին, 1988 թ. ծնված Ս. Մ.-ին, 1991 թ. ծնված Կ. Ս.-ին և 1993 թ. ծնված Մ. Խ.-ին:

Նրանց անձնական խուզարկությամբ՝ Գ. Հ.-ի տաբատի գրպանից հայտնաբերվել է «Լիրիկա» գրառմամբ դեղահաբի տուփ՝ 300 մլգ 5 դեղահաբով, 1 հատ ապակյա կաթոցիչ՝ լցված չորացված մանրացված դեղնականաչավուն կանեփանման զանգվածով՝ ընդհանուր 4,6 գ կշռով, իսկ տաբատի հետևի գրպանից հայտնաբերվել է թղթի կտոր՝ լցված չորացված, մանրացված դեղնականաչավուն կանեփանման զանգվածով՝ 0.1 գ կշռով: Կ. Ս.-ի բաճկոնի գրպանից հայտնաբերվել է նաև ծալովի դանակ՝ ծալված վիճակում 10,5 սմ երկարությամբ, 7,2 ս/մ շեղբի երկարությամբ:

Նշենք, որ ըստ մամուլի տեղեկությունների՝ Գ.Հ.–ն Օշականի բնակիչ Գրիգոր Հակոբյանն է, որը «օրենքով գող» Օշականցի Գևորիկի եղբոր տղան է՝ «Կոկս» մականունով։

Ձեռնարկվում են միջոցներ հայտնաբերվածի ձեռք բերման աղբյուրը և հանգամանքները պարզելու ուղղությամբ:

Նշանակվել են փորձաքննություններ:

Գ. Հ.-ի վարած «Մերսեդես 600», Դ. Հ.-ի վարած «Ֆոլքսվագեն Պոլո» և Ա. Ղ.-ի «Օպել Աստրա» մակնիշի ավտոմեքենաները տեղափոխվել են Ճանապարհային ոստիկանության հատուկ պահպանվող տարածք:

Կատարվում է քննություն:

Ավելի վաղ հայտնել էինք, որ Վանաձորում հատուկ ոստիկանական օպերացիա է իրականացվել՝ «Տերևաթափ Վանաձորում» անվանումով, որի շրջանակում բերման է ենթարկվել նաեւ Օշականցի Գևորիկի եղբոր որդին՝ «Կոկսը»։