Ֆուտբոլի Եվրոպայի առաջնության եզրափակիչ մրցաշարում հունիսի 23-ին կավարտվի խմբային փուլը և հայտնի կդառնան 1/8 եզրափակիչի բոլոր զույգերը: Վերջին՝ երրորդ տուրի հանդիպումները կանցկացնեն E ու F խմբի թիմերը:
F խմբում աշխարհի գործող չեմպիոն Ֆրանսիայի հավաքականը Հունգարիայի մայրաքաղաք Բուդապեշտում կմրցի Եվրոպայի չեմպիոնի տիտղոսը պաշտպանող Պորտուգալիայի հավաքականի հետ: Խմբի մյուս խաղում Գերմանիայի հավաքականը Մյունխենում կխաղա հունգարացիների հետ:
E խմբում Իսպանիայի հավաքականը Սևիլիայում կհանդիպի Սլովակիայի թիմի հետ, իսկ Շվեդիայի ու Լեհաստանի հավաքականները կհանդիպեն Սանկտ Պետերբուրգում:
Հիշեցնենք, որ Եվրո-2020-ի 6 խմբերից փլեյ-օֆֆի (1/8 եզրափակիչ) ուղեգիր են նվաճում առաջին ու երկրորդ տեղ գրաված հավաքականները, նաև լավագույն արդյունքով երրորդ տեղ զբաղեցրած 4 թիմեր:
Եվրոպայի առաջնության եզրափակիչ մրցաշարն առաջին անգամ անցկացվում է 11 երկրների 11 քաղաքներում: Առաջին անգամ չեմպիոնի կոչման համար պայքարում է 24 թիմ:
Եվրո-2020, խմբային փուլ, երրորդ տուր
E խումբ
Սլովակիա – Իսպանիա՝ 20:00 (Սևիլիա)
Շվեդիա – Լեհաստան՝ 20:00 (Սանկտ Պետերբուրգ)
Մրցաշարային դրություն. Շվեդիա՝ 4 միավոր, Սլովակիա՝ 3, Իսպանիա՝ 2, Լեհաստան՝ 1
F խումբ
Պորտուգալիա – Ֆրանսիա՝ 23:00 (Բուդապեշտ)
Գերմանիա – Հունգարիա՝ 23:00 (Մյունխեն)
Մրցաշարային դրություն. Ֆրանսիա՝ 4 միավոր, Գերմանիա, Պորտուգալիա՝ 3-ական, Հունգարիա՝ 1
