Ռուսաստանում մեկնարկած ֆուտբոլի աշխարհի 21-րդ առաջնությունում հունիսի 15-ին տեղի կունենա 3 հանդիպում։

A խմբում Ուրուգվայ – Եգիպտոս խաղով կավարտվի առաջին տուրը։ Հիշեցնենք, որ այս խմբի և ընդհանրապես առաջնության մեկնարկային խաղում Ռուսաստանի հավաքականը «Լուժնիկիում» 5 անպատասխան գնդակ ուղարկեց Սաուդյան Արաբիայի դարպասը։ Ստանիսլավ Չերչեսովի գլխավորած թիմը կարծես ցույց տվեց, որ տնային մունդիալում լուրջ հավակնություններ ունի։

Այսօր պարզ կդառնա, արդյո՞ք Եգիպտոսը ունակ է առանց իր առաջատարի պայքարել Հարավային Ամերիկայի լավագույն հավաքականներից մեկի հետ։ Սակայն հնարավոր է, որ «Լիվերպուլի» հարձակվողը մասնակցի այդ խաղին։ Եգիպտոսի հավաքականի գլխավոր մարզիչ Էկտոր Կուպերը տեղեկացրել է, որ Սալահը ամբողջովին վերականգնվել է ուսի վնասվածքից։

Ի տարբերություն մրցակցի, Ուրուգվայի ճամբարում կորուստներ կարծես չկան։ ԱԱ-2010-ի կիսաեզրափակիչի մասնակիցների հարձակման գծում աֆրիկյան հավաքականի պաշտպանությանը կսպառնան Էդիսոն Կավանին և Լուիս Սուարեսը։

Ուրուգվայ - Եգիպտոս խաղը կմեկնարկի Երևանի ժամանակով 16։00-ին։

B խմբում պայքարն է սկսելու Եվրո-2016-ի չեմպիոն Պորտուգալիայի հավաքականը։ Կրիշտիանու Ռոնալդուի առաջնորդությամբ պորտուգալացիները խաղալու են Իսպանիայի հետ։ Ստացվեց այնպես, որ հենց առաջին տուրում հանդիպելու են խմբի բացահայտ ֆավորիտները։

Իսպանիայի նորանշանակ գլխավոր մարզիչ Ֆերնանդո Իերոն հենց առաջին խաղում նման լուրջ փորձության է ենթարկվելու։ Հիշեցնենք, որ ԱԱ-ի մեկնարկից մեկ օր առաջ Իսպանիայի հավաքականի ղեկից հեռացվեց Խույլեն Լոպետեգին, որը հաջորդ մրցաշրջանից գլխավորելու է Մադրիդի «Ռեալը»։

Հավաքականները վերջին անգամ հանդիպել են Եվրո-2012-ի կիսաեզրափակիչում։ Այն ժամանակ խաղի հիմնական ժամանակն ավարտվեց 0։0 հաշվով, իսկ հետխաղյա 11-մետրանոցներում ավելի հաջողակ էին իսպանացիները։ Հիշեցնենք, որ այդ տարի Իսպանիան դարձավ Եվրոպայի չեմպիոն։

Պորտուգալիա – Իսպանիա հանդիպումը տեղի կունենա Սոչիի «Ֆիշտ» ստադիոնում և կմեկնարկի Երևանի ժամանակով 22։00-ին։

B խմբի մյուս խաղում մրցելու են Մարոկկոյի և Իրանի հավաքականները։ Այդ խաղը կկայանա Սանկտ Պետերբուրգում և կմեկնարկի Երևանի ժամանակով 19։00-ին։

Նյութի աղբյուրը ՝ News.am