Պաշտպանության նախարար Լլոյդ Օսթինին կիրակի օրը տեղափոխել են Ուոլթեր Ռիդ ազգային ռազմական բժշկական կենտրոն՝ ուրոլոգիական ախտանիշները գնահատելու համար: Այս մասին հայտարարել է Պենտագոնի գլխավոր քարտուղար Պատրիկ Ռայդերը, փոխանցում է «Ամերիկայի ձայնը»։
Հաղորդագրության համաձայն՝ միջադեպի մասին ծանուցվել է պաշտպանության փոխնախարարը և շտաբների պետերի միացյալ կոմիտեի նախագահը։ Բացի այդ, այդ մասին ծանուցվել է Սպիտակ տունն ու Կոնգրեսը։
Պենտագոնի մամուլի ծառայությունը հայտնել է, որ պաշտպանության փոխնախարար Քեթլին Հիքսը հրամանատարությունն ու պարտականությունները ստանձնել է պաշտպանության նախարար Օսթինից Վաշինգտոնի ժամանակով 16:55-ին (արևելյան ժամանակով):
Հիշեցնենք, որ դեկտեմբերի 22-ին 70-ամյա Օսթինն ընդունվել էր Մերիլենդի կլինիկա՝ շագանակագեղձի քաղցկեղի բուժման համար։ Նա կլինիկա է վերադարձել հունվարի 1-ին՝ առաջացած բարդությունների պատճառով և այնտեղ անցկացրել մոտ երկու շաբաթ։
Հիշեցնենք նաև, որ Պաշտպանության նախարարության գլխավոր տեսուչի գրասենյակը անցյալ ամիս հայտարարել էր, որ Օսթինի հոսպիտալացման հանգամանքների հետաքննություն է սկսել։
Սա առաջին անկախ և անկուսակցական հետաքննությունն է այն մասին, թե ինչու Սպիտակ տունը և Կոնգրեսը մի քանի օր տեղյակ չէին Օսթինի շագանակագեղձի քաղցկեղի ախտորոշման, նրա հոսպիտալացման և նրա ենթարկված վիրահատության մասին: Հաղորդվում է, որ նախագահ Ջո Բայդենը չի իմացել պաշտպանության նախարարի հոսպիտալացման մասին մինչև հունվարի 4-ը։
Պենտագոնը և հանրապետական օրենսդիրները հայտարարել են, որ իրենք կանցկացնեն իրենց վերանայումները:
