ԱԺ պատգամավոր Արման Բաբաջանյանը ֆեյսբուքյան իր էջում գրել է. «Այսօր Վարչական դատարանը՝ դատավոր Ռաֆիկ Խանդյանի նախագահությամբ, բավարարել է ՀՀ երկրորդ նախագահ Ռոբերտ Քոչարյանի պաշտպան Արամ Օրբելյանի հայցադիմումը։ Ըստ այդմ՝ մինչև նոր տեսակի կորոնավիրուսի համավարակի ավարտը Ռ․ Քոչարյանը կշարունակի մնալ «Իզմիրլյան» ԲԿ-ում։

Դատական նիստն ընթացել է դռնփակ ռեժիմով, քանի որ դատարանին ներկայացվել են բժշկական տեղեկություններ։ Սա հերթական դատական վճիռն է, որը մեր դատական համակարգի ախտորոշման արտահայտություններից է։ Մեր բարձրաձայնումներն ու ահազանգերը, որ դատական համակարգի ներկայացուցիչների մեծ մասը շարունակում է գտնվել նախկին իշխանությունների ու օլիգարխների ազդեցության տակ, անհիմն չեն։

Այսօրվա դատական վճիռը կայացրած դատավոր Խանդյանը Երևանի նախկին քաղաքապետ, ՀՀԿ–ական Գագիկ Բեգլարյանի՝ Չոռնի Գագոյի փեսան է և դրանով ամեն ինչ ասված է։ Ակնհայտ է, որ նախկին իշխանության ամենակարկառուն ներկայացուցիչներից մեկի ազգականը չէր կարող Քոչարյանի վերաբերյալ այլ վճիռ կայացնել։

Խնդիրը, սակայն, ամենևին Քոչարյանի առողջական վիճակը չէ։ Եթե նա իսկապես խոցելի խմբում է և կալանավայրում գտնվելը կարող է վտանգել նրա առողջությունը, ամեն ինչ իրավաչափ է։ Սակայն այս դեպքում խախտվում է սոցիալական արդարադատությունը, քանի որ Քոչարյանի տարիքի ու զանազան հիվանդություններ ունեցող տասնյակ կալանավորներ շարունակում են գտնվել ազատազրկման վայրերում։

Հետևաբար, եթե կալանավորներից մեկի, տվյալ դեպքում՝ Ռոբերտ Քոչարյանի նկատմամբ կիրառվում է ազատազրկման մեղմացման այս ռեժիմը, նույնը պետք է կիրառվի նաև համանման վիճակում գտնվող այլ կալանավորների նկատմամբ։ Դա, սակայն, տեղի չի ունեցել, ինչը հիմք է տալիս ենթադրելու, որ գործ ունենք ընտրովի արդարադատության հետ, որի համար հիմք են հանդիսացել ոչ թե Քոչարյանի առողջական վիճակի վերաբերյալ տեղեկությունները, այլ` քաղաքական նպատակահարմարությամբ պայմանավորված գործոնները։

Դատական համակարգը կայացրել է նախկին իշխանություններին հաճո հերթական վճիռը, ինչը լրացուցիչ անգամ գալիս է վկայելու դատավորների շրջանում համատարած վեթինգի իրականացման կենսական անհրաժեշտությունը։ Առանց վեթինգի իրականացման մենք շարունակելու ենք դատական համակարգից ստանալ նման վճիռներ, որոնք սպասարկելու են ոչ թե ՀՀ քաղաքացու ու արդարադատության, այլ` նախկին իշխանությունների քաղաքական և այլ շահերը»: