Ինչպես արդեն հայտնել ենք, ԱԱԾ-ն վաղ առավոտից խուզորկում է ԲՀԿ առաջնորդ, պատգամավոր Գագիկ Ծառուկյանի՝ Առինջի առանձնատունը: ԱԺ «Բարգավաճ Հայաստան» խմբակցության անդամ Նաիրա Զոհրաբյանի տեղեկություններով՝ պատճառը 2017 թվականին տեղի ունեցած խորհրդարանական ընտրությունների ժամանակ Մարտունիի ԲՀԿ-ական թեկնածուներից մեկի` Վազգեն Պողոսյանի հետ եղած ենթադրյալ ֆինանսական խնդիրներն են:
Վազգեն Պողոսյանը Գեղարքունիքի մարզից ռեյտինգային ընտրակարգով առաջադրվել էր 2017 թվականին կայացած խորհրդարանական ընտրությունների ժամանակ և հանդիսանում էր Երեւանի պետական Ճարտարապետաշինարարական համալսարանի պրոֆեսոր։ Նա այդ ընտրություններում թիվ 8 ընտրատարածքն ընդգրկող մարզից ստացել էր 8151 ձայն։ Ընդ որում, նրա ստացած ձայները մարզում երկրորդն են եղել․ առաջատարը եղել է Հրանտ Մադաթյանը՝ 11971 ձայնով, իսկ երրորդը՝ Վարդան Բոստանջյանը՝ 7024 ձայնով։ Սակայն Պողոսյանն այդպես էլ մանդատ չէր ստացել՝ այն զիջելով Բոստանջյանին։ Այդ տարի ընդհանուր առմամբ 28 հոգի հրաժարվել էր մանդատից, որից մեկն էլ եղել էր Պողոսյանը։
Նա նաև 1993-2005 թվականներին եղել է Հայաստանի շինարարների միության նախագահ, 2005 թվականից՝ պատվավոր նախագահ: Եղել է ՀՀ ԳԽ (1990-1995) և ԱԺ (1995-1999) պատգամավոր:
Նշենք, որ Պողոսյանը շինարարների միության նախագահ, ճարտարապետության եւ շինարարության համալսարանի նախկին ռեկտոր Գագիկ Գալստյանի հետ միասին անցնում էր նաև Քաղաքաշինության կոմիտեի նախկին նախագահ Վահագն Վերմիշյանի գործով։
Նյութի աղբյուր՝ https://lurer.com/?p=372683&l=am
Բախումներ հրահրողներն էլ եք դուք, պատերազմ բերած մարդիկ էլ. Բագրատ Սրբազան 
