Կրեմլը մանրամասներ է հայտնել Վլադիմիր Պուտինի եւ Նիկոլ Փաշինյանի երեկվա հեռախոսազրույցից
Ռուսաստանի նախագահ Վլադիմիր Պուտինը երեկ ՀՀ վարչապետ Նիկոլ Փաշինյանի հետ ունեցած հեռախոսազրույցի ընթացքում հայտարարել էր, որ կողմնակից է, որպեսզի Հայաստանում իրավիճակը կարգավորվի օրենքի շրջանակներում։ Այս մասին հայտարարել էր ՌԴ նախագահի խոսնակ Դմիտրի Պեսկովը։

Սակայն Պուտին-Փաշինյան հեռախոսազրույցի մասին ՀՀ վարչապետի կայքում հրապարակվել էր հաղորդագրություն, որտեղ գրվել էր, որ «Պուտինը աջակցություն է հայտնել Հայաստանի օրինական իշխանություններին» մինչդեռ Կրեմլի հայտարարությունում նման նախադասություն չկա եւ ասվում է միայն, որ Պուտինը կողմ է արտահայտվել, որ պահպանվի կարգուկանոնը եւ հանգստությունը Հայաստանում եւ իրավիճակը կարգավորվի օրենքի շրջանակներում։


Այս առնչությամբ, այսօր հավելյալ պարզաբանում է հրապարակել Կրեմլի խոսնակ Դմիտրի Պեսկովը։ Նա մասնավորապես ասել է․ «Եթե ուշադիր եք կարդացել երեկվա տեքստը, որը մենք ենք հրապարակել, ամենայն հավանականությամբ հնարավորություն ունեցել եք տեսնելու այն նախադասությունը, որտեղ ասված է, որ ՌԴ նախագահը կողմ է արտահայտվել, որպեսզի խնդիրը կարգավորվի օրենքի շրջանակում։ Սա շատ կարեւոր է։ Բավականին ամբողջական կերպով մենք ձեւակերպել ենք /նախագահի խոսքերը/, եւ բավականին ինֆորմատիվ»,- ասել է Պեսկովը։