Սայաթ-Նովա-Նալբանդյան խաչմերուկների բակում հերթական հյուրանոցի կամ ռեստորանի շինարարությունը ժամանակավորապես սառեցվել է: Այս մասին YerevanNews.am-ի հետ զրույցում նշեց բնակիչ Ալբերտ Գևորգյանը:
«Պատգամավոր Գարեգին Նուշիկյանը միջնորդել է քաղաքապետին, քաղաքապետը որոշել է սառեցնել մինչև մասնագետներից խումբ կստեղծվի և որոշում կկայացվի հնարավոր է այստեղ շինարարություն իրականացնել, թե ոչ», - նշեց նա:
Բնակիչը հավելեց, թե համոզված է, որ քաղաքապետարանի խումբը կհամոզվի, որ այն շենքը, որը նախատեսված էր կառուցել, այստեղ բացառվում է: «Որովհետև նման տեղ չկա, պայմաններ չկան, կարծում եմ քաղաքապետը ճիշտ որոշում կկայացնի», - նշեց նա:
Հիշեցնենք, որ YerevanNews.am-ը տեղեկացրել էր, որ Սայաթ- Նովա – Նալբանդյան խաչմերուկների բակում «Լարկո գրուպ» ՍՊԸ-ն պատրաստվում էր կառուցել բազմաֆունկցիոնալ շենք, ինչին դեմ էին բնակիչները և դիմել էին բազմաթիվ անձանց և կառույցների` խնդրի լուծման համար: Նրանք ընդվզում էին, քանի որ շինարարության համար պետք է օգտագործվել երեխաների համար նախատեսված խաղահրապարակը:
Լուսանկարը` Հայկ Բիանջյանի