ԱՄՆ սենատի միջազգային հարաբերությունների հանձնաժողովի նախագահ Բոբ Մենենդեսը կոչ է արել նախագահ Բայդենին միանալ Կոնգրեսին և ճանաչել հայերի Ցեղասպանությունը, ինչպես նաև ջանքեր գործադրել Ադրբեջանում պահվող հայ գերիներին ազատելու ուղությամբ։ Նույն կոչով նախագահականին է դիմել կոնգրեսականն Ֆրենկ Փալոունը։ Իսկ Կոնգրեսի հայկական խումբը այս շաբաթ քննարկման կդնի հայ գերիների մասին բանաձև։


Ջո Բայդենի վարչակազմը դեռ չի արտահայտել իր վերաբերմունքը Ղարաբաղյան հակամարտության վերաբերյալ։ Արդյոք Վաշինգտոնը դիտարկում է Ղարաբաղյան հարցը Մերձավոր արևելքում ընթացող ավելի լայն գործընթացների համատեքստում։ Եվ ի՞նչ դերում կլինի Հայաստանը ըստ Վաշինգտոնի։


Օրերս ԱՄՆ պետքարտուղար Էնթոնի Բլինքենը զանգահարել է Նիկոլ Փաշինյանին։ Նրանք խոսել են երկկողմ համագործակցության մասին։ Ընդ որում, ոչ ԱՄՆ նախագահը, ոչ պետքարտուղարը մինչ օրս չեն խոսել Ադրբեջանի և Թուրքիայի նախագահների հետ։

ԱՄՆ-ն խոչընդոտել է թուրքական արտադրության 30 ԱՏԱԿ հարվածային ուղղաթիռների մատակարարումը Պակիստան, «այժմ այդ տենդերը, հավանաբար, կշահի Չինաստանը», հայտարարել է Թուրքիայի նախագահի խոսնակ Իբրահիմ Քալընը։ Պայմանագրի իրականացումը հետաձգվել է այն բանից հետո, երբ ԱՄՆ-ն հրաժարվել է Թուրքիային տրամադրել շարժիչների արտահանման թույլտվություն С-400-ի պատճառով։ «Երբ մի պետություն պարտադրում է մաքսիմալիստական մոտեցում, այսինքն «կամ անում եք այնպես, ինչպես մենք ենք ուզում, կամ ոչ մի կերպ», դա ունենում է հակառակ արդյունք։ С-400-ի մասին որոշումը չի ընդունվել վարկյանական, նրանք չեն ներառվի ՆԱՏՕ-ի ՀՕՊ համակարգերում», ասել է Թուրքիայի նախագահի խոսնակը։

ԱՄՆ նոր վարչակազմի և Թուրքիայի հարաբերությունների լարվածությունը մտահոգություններ է առաջացնում Բաքվում և Անկարայում։ Շտապողականությունը, որով նրանք Ռուսաստանի հետ փորձում են ամրապնդել Հայաստանի դեմ ահաբեկչական պատերազմի արդյունքները, խոսում է այն մասին, որ նրանց հայտնի չեն Վաշինգտոնի ծրագրերը, ռուս-թուրքական Մոսկովյան պայմանագրի 100-ամյակի շեմին։

Ահա թե ինչ է գրել Գերմանիայում ԱՄՆ դեսպան Ջեյմս Ջերարդը 1921 թվականի մարտի 16-ի պայմանագրի վերաբերյալ. «1921 թվականի մարտի 16-ին բոլշեվիկները Քեմալի հետ կնքել են պայմանագիր, ըստ որի Հայաստանի Հանրապետության մի մասը փոխանցել են Թուրքիային, մյուս երկու մասերը՝ Սդրբեջանին, իսկ այն, ինչ մնացել է, անվանել են «Խորհրդային Հայաստան» և բռնակցել Ռուսաստանին»:

Միեւնույն ժամանակ, Մերձավոր Արևելքում Իսրայելի հետ «Աբրահամյան համաձայնություններին» բազմաթիվ երկրների միանալը, քրդերի հարցը Սիրիայում և Իրաքում, ԱՄՆ և Իրանի միջեւ բանակցությունների հնարավորությունը կարող են «լուսանցք» մղել Թուրքիային և Ռուսաստանին։

Իրաքի Նաջաֆե քաղաքում Հռոմի Ֆրանցիսկ Պապը պատմական հանդիպում է ունեցել Իրաքի շիա իսլամի առաջնորդի հետ։ Պապն առաջին անգամ է հանդիպում շիա իսլամի նման բարձրաստիճան հոգևորականի հետ։ Այնուհետև նա այցելել է Իրաքի հարավում գտնվող Ուռա հինավուրց քաղաքի փլատակներ, որը հայտնի է որպես Աբրահամի ծննդավայր։

Նյութի աղբյուր՝ https://www.lragir.am/2021/03/09/625882/