Մայրաքաղաքի հանգստի գոտիների և անտառպուրակային տարածքների, ինչպես նաև քաղաքի համար կարևոր նշանակություն ունեցող վայրերի հարակից հատվածներում  <<Ավելի մաքուր Երևան>> ծրագրի շրջանակում շարունակվում են սանիտարական մաքրման աշխատանքները: Շուրջ 400 կամավորների մասնակցությամբ մաքրվել և համապատասխան տեսքի է բերվել Նոր Նորք վարչական շրջանի Հայորդաց տան և Սուրբ Սարգիս եկեղեցու հարակից անտառպուրակային հատվածը: 

Աշխատանքներին միացել էին նաև Երևանի ավագանու անդամներ: Անհրաժեշտ բոլոր գործիքների և այլ պարագաների տրամադրումը հոգացել էր Երևանի քաղաքապետարանը: Ջրցան մոքենաներով կազմակերպվել է նաև տարածքի ոռոգումը:
Աշխատանքներին տեղում ծանոթացել ու մաքրմանն անձամբ միացել է քաղաքապետի առաջին տեղակալ Կամո Արեյանը: 

«Արձագանքելով քաղաքապետարանի՝ <<Ավելի մաքուր Երևան>> ծրագրին միանալու  կոչին այսօր աշխատանքներին մասնակցում են ինչպես հասարակական կազմակերպությունների ներկայացուցիչներ, այնպես էլ վարչական շրջանի տասնյակ բնակիչներ, այդ թվում` երիտասարդներ ու դպրոցականներ, ինչը գործնականում փաստում է մայրաքաղաքի նկատմամբ նրանց սերն ու հոգատարությունը: Մենք նախապես դիմել էինք նաև Երևանի ավագանու բոլոր խմբակցություններին` ակնկալելով նրանց մասնակցությունը: Այսօր միայն Հայաստանի հանրապետական կուսակցության խմբակցությունն է արձագանքել և ակտիվորեն մասնակցում է ծրագրին»,-ընդգծել է Կամո Արեյանը:

Ավագանու անդամներն իրենց հերթին, կարևորելով նախաձեռնությունը, նշել են, որ քաղաքի մաքրության ապահովումը յուրաքանչյուր երևանցու պարտքն է քաղաքի նկատմամբ և հավելել, որ առաջիկայում ևս իրենց ակտիվ մասնակցությունը կբերեն նման ծրագրերում: Արդեն հաջորդ շաբաթ <<Ավելի մաքուր Երևան>> ծրագրի շրջանակում սանմաքրման  աշխատանքներ են նախատեսված Եռաբլուր պանթեոնի հարակից տարածքում: Նշենք, որ հունիսի 22-ից մեկնարկած և շարունակվող ծրագիրը Երևանի քաղաքապետ Տարոն Մարգարյանի նախաձեռնությամբ է իրականացվում:

Երևանի քաղաքապետարանի տեղեկատվության 
և հասարակայնության հետ կապերի վարչություն