Այսօր  անժամկետ նստացույց  հայտարարած  երիտասարդները` լրատվամիջոցների  ուղեկցությամբ ցանկանում էին հանդիպել քաղաքապետի հետ և քննարկել հովանոց տեղադրելու հարցը: Այդ նպատակով իրենք նամակով  դիմել էին քաղաքապետարան և տեղեկացրել իրենց որոշման մասին:

Նշանակված ժամին բոլորն այնտեղ էին, սակայն քաղաքապետարանի շենք մտնելու փոխարեն, ակտիվիստների և լրագրողների հարցերին շենքի բակում պատասխանեց Երևանի քաղաքապետարանի հասարակայնության հետ կապերի  վարչության պետ Արթուր Գևորգյանը:

Նա նշեց, որ մերժվում է  խնդիրը քաղաքապետարանի ներսում քննարկելու առաջարկը, քանի որ խոսքը վերաբերում է միայն հովանոցին: «Խնդիրն այն է, որ  ամբողջ հարցը պետք է  քննարկվի, ոչ թե հովանոցը», - նշեց նա, հավելելով, որ  հովանոցի տեղադրման  հարցերի պատասխանը պաշտոնապես տրվել է:

Նստացույցի մասնակիցներից  Գոռը նշեց, որ իրենց անհասկանալի է  պատասխանի  մեջ գրված  «օգտագործեք այլ միջոցներ» անվանումը, ինչին ի պատասխան, Ա. Գևորգյանը  խորհուրդ տվեց գրավոր տարբերակով դիմել ի՞նչ է  նշանակում  այլ միջոցներ  հարցումը և ստանալ պատասխան:(Նշենք, որ  քաղաքապետարանի  կողմից  պատասխանի մեջ նշված է, որ նստացույցի մասնակիցները արևից պաշտպանվելու համար կարող են դիմել այլ միջոցների):

Քաղաքապետարանի աշխատակիցը նաև նշեց, որ իրենք մշտապես պատրաստ են քննարկման, սակայն միայն քննարկելու համար այն խնդիրները, որոնք պատճառ են հանդիսացել նստացույցի համար:

Հիշեցնենք, որ  նստացույցի մասնակիցներն այսօր նամակ էին ուղարկել քաղաքապետարան, որտեղ մասնավորապես ասվում էր, որ քանի որ քաղաքապետը հերթական անգամ պատրաստակամություն է  հայտնել քաղաքապետարանի տարածքում հանդիպել և քննարկել առկա խնդիրները և քանի որ հովանոցի տեղադրումը հանդիսանում է հրատապ խնդիր, դա քննարկելու համար որոշել են այսրժօր հանդիպել և քննարկել: 

Տեսանյութը՝ քիչ ուշ: