Երևանի Կենտրոն և Նորք-Մարաշ վարչական շրջանների ընդհանուր իրավասության դատարանում՝ նախագահությամբ դատավոր Մխիթար Պապոյանի, Սոցիալական ապահովության պետական ծառայության նախկին պետ Վազգեն Խաչիկյանի ու մյուսների գործով այսօրվա նիստում հարցաքննվեց դատակոչված 1 վկա՝ Երվանդ Սիմոնյանը, ով մասնակիցներից ոչ մեկի չճանաչեց,-այս մասին գրում է Փաստինֆոն:
Գործն առնչվում էր նրա հորը, ով վկայի խոսքով 1998թ.-ից գտնվում է ԱՄՆ-ում: Դատախազի այն հարցին, թե արդյոք վկայի հայրը մեկնելուց հետո շարունակել է կենսաթոշակ ստացանալ՝ վկան բացասական պատասխանեց: Այսօրվա միակ վկայի հարցաքննությունից հետո դատարանը հայտարարեց, որ 18 վկա էլ գրություն են ուղարկել դատարանին, որ այս կամ այն պատճառաբանությամբ չեն կարող ներկայանալ հարցաքննությանը՝ խնդրելով հիմք ընդունել նախաքննական ցուցմունքները: Վկաների գրություններում մասնավորապես նշվում էր, որ նրանք վատառողջ են, կամ բացակայում են Հայաստանից: Վատառողջ վկաների գրություններից մի քանիսի հետ կցված էր նաև վկայի հիվանդությունը հաստատող բժշկական տեղեկանք, ինչն էլ հիմք ընդունելով դատարանը ընթերցեց տվյալ վկաների նախաքննական մարմնին տված ցուցմունքները:
Մյուսների դեպքում էլ դատավարության մասնակիցներն առարկեցին եւ դատարանն էլ գտավ, որ միայն գրությունը չի կարող հիմնավոր համարվել՝ վկաների բացակայությունը գնահատելով անհարգելի: Այդուհանդերձ՝ դատավոր Պապոյանը հայտարարեց, որ չեն շտապելու վկաներին բերման ենթարկելու որոշում կայացնել՝ հաշվի առնելով, որ նրանք մեծամասամբ տարեցներ են: Վկա Աննա Պողոսյանը դատարանին հասցեագրված գրության մեջ նշել էր, որ հղի է և չի կարող ներկայանալ հարցաքննությանը՝ կից ներկայացնելով, նաև բժշկի տեղեկանք:
Վկան խնդրել էր հիմք ընդունել և հրապարակել նախաքննական մարմնին տված իր ցուցմունքը: Ի զարմանս դատարանի՝ կողմերն առարկեցին, սակայն դատարանը որոշեց հղի կնոջն ընդառաջել և հրապարակեց վկայի նախաքննական ցուցմունքը: Վկա Վանիկ Չիլոյանի ծանուցումն էլ հետ էր եկել. նա ներկայումս բնակվում է Նյու- Յորքում։ Պաշտպան Արա Զաքարյանը միջնորդեց դատակոչման ցուցակից հանել վկային, ինչը դատարանը մերժեց։ Հաջորդ նիստը տեղի կունենա օգոստոսի 22-ին, որին ներկայանալու համար դատարանը նպատակահարմար գտավ ծանուցել բոլոր չհարցաքննված վկաներին:
Ի դեպ նշենք, որ գործով նախատեսվում է հարցաքննել շուրջ 190 վկայի, որոնցից առայժմ հարցաքննվել են 89-ը:
Նիկոլ Փաշինյանը պատմել է, թե ինչու է որոշել սափրվել 
