Գնահատման և թեստավորման կենտրոնը, հրապարակած տվյալների համաձայն, 2021 թվականի միասնական քննություններն անցկացվելու են հետևյալ բաշխվածությամբ. «Կենսաբանություն», «Աշխարհագրություն» և «Համաշխարհային պատմություն» առարկաների քննությունը կկայանա հունիսի 8-ին, «Օտար լեզուներինը»՝ հունիսի 11-ին, «Հայոց լեզու և հայ գրականությունը»՝ հունիսի 15-ին, «Մաթեմատիկան»՝ հունիսի 18-ին, «Հայոց պատմությունն» ու «Ֆիզիկան»՝ հունիսի 22-ին և «Քիմիան» ու «Ռուսաց լեզուն»՝ հունիսի 25-ին:
«Արմենպրես»-ի մամուլի սրահում հրավիրված ասուլիսում ՀՀ ԿԳՄՍ նախարարության գնահատման և թեստավորման կենտրոնի փոխտնօրեն Կարո Նասիբյանը նշեց, գործելու են 36 քննական կենտրոններ, որոնցից 13-ը Երևանում է, մնացածը՝ մարզերում:
Համավարակով պայմանավորված՝ քննական կենտրոններում կանխարգելիչ միջոցառումներ կձեռնարկվեն: Առկա են լինելու ախտահանման միջոցներ, դիմակներ:
«Ե՛վ քննական կենտրոններն են ավելացվել, և՛ քննական սենյակները: Քննասենյակներում էլ առավել քիչ թվով դիմորդներ են ընդգրկվելու: Եթե նախորդ տարիներին մի քննասենյակում ունենում էինք 100-120 դիմորդ, ապա հիմա 60-80-ի շրջանակում է լինելու»,- ասաց Կարո Նասիբյանը:
Գնահատման և թեստավորման կենտրոնը հատուկ ուշադրություն է դարձնելու դիմորդների հնարավոր «հնարամտություններին», որոնցով փորձում են հեռախոսներ, հուշման թերթիկներ անցկացնել քննասենյակ:
«Ասեմ, որ դիմորդները հիմնականում շատ պարտաճանաչ են և հանգիստ հենց սկզբից անցնում են հանձնարարություններին: Շատ փոքր տոկոս կա, որ դիմում է տարբեր «հնարամտությունների»՝ փորձելով գնահատականներ փախցնել: Ասենք, բերում են 3-4 հեռախոս: Ասեմ, որ լինելու ենք խիստ և հեռախոս հայտնաբերելու դեպքում հեռացնելու ենք քննասենյակից»,- ասաց Կարո Նասիբյանը:
Նիկոլ Փաշինյանը պատմել է, թե ինչու է որոշել սափրվել 
