Ուզբեկստանի մայրաքաղաք Տաշքենդում ընթացող ծանրամարտի աշխարհի առաջնության մրցումային 9-րդ օրը Հայաստանն ունի երեք ներկայացուցիչ: Տղամարդկանց 102 կգ քաշայինների պայքարում մրցահարթակ դուրս կգան Եվրոպայի չեմպիոն Սամվել Գասպարյանն ու Եվրոպայի փոխչեմպիոն Արսեն Մարտիրոսյանը: Կանանց 81 կգ քաշային կարգում պայքարի մեջ կմտնի կանանց Հայաստանի հավաքականի միակ ներկայացուցիչ Տաթեւ Հակոբյանը:

Առաջինը մրցահարթակ դուրս կգա Տաթեւ Հակոբյանը, որը 2013 թվականի Եվրոպայի Մ-17 առաջնության բրոնզե մեդալակիր է (170 կգ երկամարտ), 2017 թվականի Եվրոպայի առաջնության բրոնզե մեդալակիր: Նույն տարում Եվրոպայի Մ-23 փոխչեմպիոնն է 90 կգ քաշայինների պայքարում (228 կգ երկամարտ): 2018 թվականի Հայաստանի չեմպիոնն է 90 կգ քաշայինների պայքարում, նույն տարում Եվրոպայի երիտասարդական չեմպիոնն է 234 կգ երկամարտի արդյունքով: 2018 թվականի մեծահասակների աշխարհի առաջնությունն անհաջող է եղել Տաթեւ Հակոբյանի համար. նա զրո է ստացել:


Բաթումիում անցկացված 2019 թվականի Եվրոպայի առաջնության 87 կգ քաշային կարգում Հակոբյանը երկամարտի 230 կգ արդյունքով գրավեց չորրորդ տեղը։ Պոկում վարժությունում հայ մարզուհին նվաճեց փոքր բրոնզե մեդալ՝ 105 կգ։ Նույն տարում Թաիլանդում անցկացված աշխարհի առաջնության երկամարտում 23-ամյա մարզուհին հավաքեց 226 կգ եւ գրավեց 10-րդ տեղը։

2021 թվականի Հայաստանի առաջնությունում Տաթեւ Հակոնյանը 87 կգ քաշային կարգում նվաճեց չեմպիոնի կոչումը: Այս նույն քաշում մասնակցեց ապրիլին Մոսկվայում անցկացված Եվրոպայի առաջնությանը, որտեղ երկամարտի 221 կգ արդյունքով գրավեց 9-րդ տեղը: Հայաստանի չեմպիոնը պոկում վարժությունում 101 կգ-ով գրանցեց 7-րդ արդյունքը, իսկ հրումում 120 կգ-ով 9-րդն էր:

Տաշքենդում 25-ամյա ծանրորդուհու նախնական պատվերը երկամարտում 250 կգ է:

Կանանց 81 կգ քաշայինների Ա խմբի պայքարը կմեկնարկի Երեւանի ժամանակով 15:00-ին:

Երեկոյան մրցահերթում 102 կգ քաշայինների պայքարում մրցահարթակ դուրս կգան Սամվել Գասպարյանն ու Արսեն Մարտիրոսյանը:

Սամվել Գասպարյանը 2015 թվականի Եվրոպայի երիտասարդական առաջնության ոսկե մեդալակիր է: 2016 թվականին Թբիլիսիում անցկացված աշխարհի երիտասարդական առաջնությունում գրավել է 4-րդ տեղը երկամարտի 359 կգ արդյունքով: 2016 թվականին Իսրայելում կայացած Եվրոպայի Մ-20 առաջնության բրոնզե մեդալակիր է 346 կգ արդյունքով: 2017 թվականին Եվրոպայի մեծահասակների առաջնությունում զբաղեցրել է 7-րդ տեղը 375 կգ երկամարտի արդյունքով:

2019 թվականին Բաթումիում տեղի ունեցած Եվրոպայի առաջնությունում Գասպարյանը երկամարտի 377 կգ արդյունքով նվաճեց արծաթե մեդալ, իսկ աշխարհի առաջնությունում երկամարտի 390 կգ արդյունքով 5-րդն էր: Թաիլանդում տեղի ունեցած աշխարհի առաջնության հրում վարժության ընթացքում ստացած վնասվածքը Սամվել Գասպարյանին խանգարեց պայքար մղել չեմպիոնության համար: Պոկում վարժությունում նա 10 կգ-ով գերազանցեց Եվրոպայի առաջնությունում գրանցած արդյունքը և, բարձրացնելով 178 կգ, նվաճեց փոքր բրոնզե մեդալ:

2019 թվականի Եվրոպայի մինչեւ 23 տարեկանների առաջնությունում Գասպարյանը հռչակվեց չեմպիոն։ 109 կգ քաշայինների պայքարում նա երկամարտում հավաքեց 390 կգ։

Մոսկվայում անցկացված Եվրոպայի առաջնությունում Սամվել Գասպարյանը 102 կգ քաշայինների պայքարում երկամարտի 390 կգ արդյունքով նվաճեց չեմպիոնի կոչումը (176+214):

Այս քաշային կարգում հանդես եկող Հայաստանի մյուս ներկայացուցիչ Արսեն Մարտիրոսյանը Եվրոպայի մինչեւ 15 տարեկանների արծաթե մեդալակիր է, 2018 թվականի Եվրոպայի երիտասարդական առաջնության բրոնզե մեդալակիր:

Բաթումիում տեղի ունեցած Եվրոպայի առաջնությունում Արսեն Մարտիրոսյանը երկամարտի 368 կգ արդյունքով 6-րդն էր:

Մոսկվայում անցկացված Եվրոպայի առաջնությունում 102 կգ քաշայինների պայքարում Մարտիրոսյանը, 10 կգ-ով զիջելով Սամվել Գասպարյանին, նվաճեց փոխչեմպիոնի կոչումը: Երկամարտում գրանցեց 380 կգ արդյունք (171+209): Հրում վարժությունում 209 կգ-ով նվաճեց նաեւ փոքր բրոնզե մեդալ:

2021 թվականի հոկտեմբերին Ֆինլանդիայի Ռովանիեմի քաղաքում անցկացված ծանրամարտի Եվրոպայի մինչեւ 23 տարեկանների առաջնությունում Արսեն Մարտիրոսյանը 109 կգ քաշայինների պայքարում նվաճեց չեմպիոնի կոչումը: Եվրոպայի փոխչեմպիոնը երկամարտում գրանցեց 383 կգ (176+207)՝ նվաճելով Մ23 Եվրոպայի առաջնության բոլոր երեք ոսկե մեդալները:

Արսեն Մարտիրոսյանը Սիմոն Մարտիրոսյանի եղբայրն է:

Սամվել Գասպարյանն ու Արսեն Մարտիրոսյանը այս քաշային կարգի ֆավորիտներից են: Եվրոպայի չեմպիոնն ու փոխչեմպիոնը հայտարվորվել են երկամարտի ամենաբարձր՝ 400 կգ նախնական պատվերներով: Նույն քաշով են հայտավորվել նաեւ Իրանի եւ Կորեայի ներկայացուցիչները:

102 կգ քաշայինների Ա խմբի պայքարը կմեկնարկի Երեւանի ժամանակով 18:00-ին