Ամերիկյան Collaborations Pharmaceuticals դեղագործական ընկերության մասնագետները գործարկել են նեյրոնային ցանց, որը ստեղծվել է «չարագործի ռեժիմում» դեղեր որոնելու համար, որպեսզի ցույց տա, թե որքան հեշտ է այս տեխնոլոգիան ի վնաս մարդկանց օգտագործել: Նրանք ապշել են, թե ինչ արագությամբ է նեյրոցանցը 40 000 պոտենցիալ մահացու մոլեկուլ ստեղծել, գրում է HighTech+-ը:
Որպեսզի արհեստական բանականությունը (ԱԲ) սկսի քիմիական զենք ստեղծել, Collaborations Pharmaceuticals-ի ինժեներները ստիպված են ընդամենը փոխել մեթոդաբանությունը, որպեսզի ալգորիթմներ փնտրեն, այլ ոչ թե խուսափեն տոքսիկ միացություններից: ԱԲ-ն տասնյակ հազարավոր նոր նյութեր է հայտնաբերել։ Դրանցից որոշներն իրենց գործունեությամբ նման են եղել Վի գազին՝ երբեւէ արտադրված ռազմական թունավոր նյութերից ամենատոքսիկին։
Հետազոտողներն իրենց հայտնագործությունը հրապարակել են Nature Machine Intelligence ամսագրում: Verge-ի լրագրողները զրուցել են գիտական խմբի ղեկավար, ընկերության գլխավոր գիտաշխատող Ֆաբիո Ուրբինայի հետ։
Նրա խոսքով՝ ԱԲ-ի օգնությամբ դեղերի մշակման մեթոդը փոխելու գաղափարը գիտնականների մոտ առաջացել է Convergence համաժողովի հրավերից հետո, որն անցկացնում է Շվեյցարիայի միջուկային, կենսաբանական եւ քիմիական պաշտպանության դաշնային ինստիտուտը։ Միջոցառման հիմնական նպատակը Քիմիական եւ կենսաբանական զենքի կոնվենցիային առնչություն ունեցող նոր հիմնական զարգացումների մասին հանրությանը տեղեկացնելն է։
ԱԲ-ի մոդելը ուսուցանվել է մոլեկուլային կառուցվածքների եւ դրանց տոքսիկության մասին երկար տարիներ հավաքված տվյալների բազայի վրա: Դրա օգնությամբ ստեղծվել է մեքենայական ուսուցման մոդել, որը հասկանում է, թե մոլեկուլյար կառուցվածքի որ տարրերն են կարեւոր տոքսիկության համար, որոնք՝ ոչ։ Հետո կարելի է նոր մոլեկուլներ տալ, եւ այն կկանխատեսի դրանց տոքսիկությունը։ Այս տեխնոլոգիան թույլ է տալիս շատ արագ տեսակավորել քիմիական միացությունները։ Collaborations Pharmaceuticals-ի գիտնականները պարզապես փոխակերպել են այս մեթոդը:
ԱԲ-ի մյուս հիմնական տարրը գեներատիվ մոդելներն են: Դրանց մեջ բեռնելով բազմաթիվ տարբեր մոլեկուլային կառույցներ՝ հետազոտողները ստանում են ցանկալի հատկություններով հնարավոր նոր մոլեկուլների ցանկ: Այս դեպքում թիրախը տոքսիկություն է:
Գիտնականները չեն պատրաստվում հաստատել ստացված 40 000 միացությունների հատկությունները, սակայն ենթադրում են, որ այս քանակի մեջ անպայման շատ արդյունավետ մոլեկուլներ կլինեն։ Դրանցից շատերը նման են եղել Վի գազի կամ ռազմական պատերազմի այլ նյութերի: Ընդ որում, դրանք ստեղծվել են այնպիսի մոդելի միջոցով, որը նախկինում երբեք կապ չի ունեցել քիմիական զենքի հետ:
«Հիմնական մտահոգությունը պարզությունն է,- խոստովանել է Ուրբինան,- Մեր օգտագործածի մեծ մասը կարելի է անվճար ձեռք բերել: Կարելի է գնալ եւ տոքսիկության մասին տվյալներ ներբեռնել ցանկացած տեղից: Եթե կա մեկը, ով Python-ով կոդ է գրում եւ հասկանում է մեքենայական ուսուցումից, ապա հանգստյան օրերին կարող եք նման գեներատիվ մոդել ստեղծել տոքսիկության տվյալների բազայի հիման վրա: Սա մեզ ստիպում է մտածել, թե արժի արդյոք հրապարակել ու հանրությանը հասանելի դարձնել հոդվածը: Չարաշահումների համար մուտքի շեմը շատ ցածր է»։
