Այսօր տեղեկություններ հրապարակվեցին այն մասին, որ ՌԴ պաշտպանության նախարար Սերգեյ Շոյգուն արդեն 12 օր է, ինչ չի հայտնվել հանրային տարածքում: Վերջին անգամ նա ռուսական գործակալությունների լրահոսում հայտնվել է մարտի 11-ին, երբ զրուցել է իր թուրք գործընկեր Հուլուսի Աքարի հետ։
Շոյգուի անհետանալու օրը հատկանշական է ոչ միայն Աքարի հետ հեռախոսազրույցի տեսակետից։ Մարտի 9-ին բացահայտվեց, որ Ուկրաինայի դեմ պատերազմին ՌԴ ռազմական ղեկավարությունն օգտագործում է նաեւ ժամկետային զինծառայողների, թեեւ Պուտինն անձամբ հայտարարել էր, թե ժամկետայիններին չեն ուղարկի Ուկրաինա։ Ներկայում ՌԴ զինվորական դատախազությունը հետաքննություն է իրականացնում, որոնց արդյունքները, ինչպես ասել է Պուտինի խոսնակ Պեսկովը, դեռ Պուտինին չեն զեկուցվել։
Այս սկանդալը, ինչպես նաեւ Ուկրաինայում ռուսական բանակի նախնական պլանների տապալումը, մարդուժի եւ տեխնիկայի խոշոր կորուստները, լոգիստիկայի խնդիրները ՌԴ ուժային բլոկում հակասությունների ու ինտրիգների պատճառ են դարձել։ Տեղյակ աղբյուրներն ասում են, թե Շոյգուն սրտի տագնապ ունի եւ մոտ օրերս կրկին կհայտնվի։ Միեւնույն ժամանակ, խոսակցություններ կան ՌԴ ԳՇ-ում պատրաստվող խոշոր փոփոխությունների մասին։
Բայց դառնանք Թուրքիայի ՊՆ Հուլուսի Աքարի հետ զրույցին։ Շոյգուն ՌԴ ԱԽ-ում այդ նույն ժամանակահատվածում ելույթի ժամանակ հայտարարել էր, թե Սիրիայից «տասնյակ հազարավոր կամավորներ» ցանկանում են ռուսական բանակի կողքին կռվել Ուկրաինայի դեմ, ինչին Պուտինը հավանություն էր տվել։ Արեւմտյան հետախուզությունները մանրամասներ են հրապարակել ռուս եւ սիրիացի զինվորականների բանակցությունների մասին, խոսքը 40 հազարանոց զորախմբի մասին է։ Վերջին բանակցությունը տեղի է ունեցել մարտի 22-ին, սիրիական կողմը կրկին խուսափողական պատասխան է տվել։
Ըստ հետախուզությունների տվյալների, Սիրիայի նախագահ Ասադը ձգձգում է խոստումը, չնայած Ռուսաստանի տված երաշխիքներին, որ Թուրքիան եւ Իսրայելը չեն օգտվի առիթից։ Շոյգուն հենց այս երաշխիքներն էր քննարկել Աքարի հետ՝ գործի է դրվել ռուս-թուրքական համագործակցությամբ 2020-ին Արցախում ծավալված ահաբեկչական սիրիական կամուրջը: Ասադը սակայն չի վստահել ռուս-թուրքական երաշխիքներին։
Շոյգուի անհետացումը կարող է կապված լինել նաեւ այս տապալման հետ։
Ո՞վ է Դիմել Քյարամյանին՝ Աղազարյանի որդու քրգործով. հայտնի են անուններ. բացահայտում. «Ժողովուրդ» 
