Հունգարիայի մայրաքաղաք Բուդապեշտում ընթացող ազատ ոճի ըմբշամարտի Եվրոպայի առաջնության երկրորդ մրցումային օրը Հայաստանը կունենա 6 ներկայացուցիչ: Պայքարը կսկսեն Արսեն Հարությունյան (61 կգ), Հրայր Ալիխանյան (74 կգ) եւ Հովհաննես Մխիթարյան (92 կգ):
Ազատ ոճի ըմբշամարտի աշխարհի առաջնության բրոնզե մեդալակիր, Եվրոպայի չեմպիոն, Մ23 աշխարհի չեմպիոն Արսեն Հարությունյանը կմեկնարկի քառորդ եզրափակիչից: Նրա մրցակիցը որակավորման փուլում կլինի ֆրանսիացի Ադամ Բիբուլատով - մակեդոնացի Բեսիր Ալիլի զույգի հաղթողը:
Մ23 աշխարհի առաջնության բրոնզե, Մ23 Եվրոպայի արծաթե մեդալակիր Հրայր Ալիխանյանը մեկնարկային 1/8 եզրափակիչում կմրցի սերբ Հետիկ Կաբոլովի հետ:
Հովհաննես Մխիթարյանը կմեկնարկի քառորդ եզրափակիչից, որտեղ նրա մրցակիցը վրացի Միրիանի Մայսուրաձեն է:
Երկրորդ մրցումային օրվա երեկոյան մրցահերթում Եվրոպայի չեմպիոնի տիտղոսի համար եզրափակիչ գոտեմարտ կանցկացնի 70 կգ քաշային Արման Անդրեասյանը: Հայ ըմբիշը ոսկե մեդալի համար կգոտեմարտի 2017 թվականի աշխարհի չեմպիոն, աշխարհի եւ Եվրոպայի կրկնակի բրոնզե մեդալակիր, Վրաստանի ներկայացուցիչ Զուրաբ Յակոբիշվիլիի հետ:
Բրոնզե մեդալի համար պայքարում Հայաստանի ներկայացուցիչ Մանվել Խնձրցյանը ուժերը կչափի գերմանացի Նիկլաս Ստեչելի հետ:
Առաջին մրցումային օրը պայքարի մեջ մտած Արման Ավագյանը բրոնզե մեդալի համար պայքարելու հնարավորություն է ստացել: Մ23 աշխարհի բրոնզե մեդալակիրը սփոփիչ գոտեմարտ կանցկացնի բուլղարացի Միրոսլավ Ստեպանով Կիրովի հետ:
65 կգ քաշային Գեւորգ Թադեւոսյանը լքել է պայքարը:
Ո՞վ է Դիմել Քյարամյանին՝ Աղազարյանի որդու քրգործով. հայտնի են անուններ. բացահայտում. «Ժողովուրդ» 
