Ռուսաստանը տեղեկություն ունի Ուկրաինայի կողմից «կեղտոտ ռումբի» կիրառմամբ ահաբեկչություն նախապատրաստելու մասին։ Այս մասին լրագրողներին հայտնել է ՌԴ նախագահի մամուլի քարտուղար Դմիտրի Պեսկովը՝ պատասխանելով հարցին, թե հետագա ի՞նչ քայլեր կձեռնարկի Մոսկվան այն բանից հետո, երբ ՄԱԿ Անվտանգության խորհրդի փակ նիստում Ուկրաինայի կողմից «կեղտոտ ռումբի» պատրաստման ապացույցներ է ներկայացրել, հաղորդում է ՏԱՍՍ-ը։

«Մենք տեղեկություն ունենք, որ Ուկրաինան պատրաստվում է նման ահաբեկչական դիվերսիայի»,- ասել է նա՝ ընդգծելով, որ Ռուսաստանի Դաշնությունը կշարունակի եռանդուն կերպով իր տեսակետը փոխանցել համաշխարհային հանրությանը, որպեսզի խրախուսի նրանց ակտիվ քայլեր ձեռնարկել՝ Կիեւի ռեժիմի նման անպատասխանատու պահվածքին խոչընդոտելու առումով։ Միաժամանակ Պեսկովը չի մեկնաբանել ՄԱԿ Անվտանգության խորհրդի փակ դռների հետեւում կատարվածի արդյունքները։


Ռուսաստանը եռանդուն քայլեր կձեռնարկի, որպեսզի համաշխարհային հանրության ուշադրությունը հրավիրի Ուկրաինայի կողմից «կեղտոտ ռումբի» կիրառման սպառնալիքի վրա, հավելել է Պեսկովը։

Երկուշաբթի օրը ՌԴ Ռադիացիոն, քիմիական եւ կենսաբանական պաշտպանության զորքերի ղեկավար Իգոր Կիրիլովը ճեպազրույցում ասել է, որ ՌԴ ՊՆ-ն իր ուժերն ու միջոցները պատրաստության է բերել «ռադիոակտիվ աղտոտման պայմաններում» գործողության համար, քանի որ տեղեկություն ունի Կիեւի կողմից «կեղտոտ ռումբ» կիրառելու մտադրության մասին։