ԱՄՆ նախագահ Ջո Բայդենն ազգային անվտանգության իր թիմին հրահանգել է կապ հաստատել իսրայելցի գործընկերների հետ՝ Երուսաղեմում հրաձգության ժամանակ վիրավորներին օգնություն ցուցաբերելու եւ մեղավորներին պատասխանատվության ենթարկելու նպատակով, հաղորդում է Սպիտակ տունը:
«ԱՄՆ-ն լիակատար աջակցություն կցուցաբերի Իսրայելի կառավարությանը եւ ժողովրդին։ Այդ կապակցությամբ նախագահն ազգային անվտանգության հարցերով իր թիմին կարգադրել է անհապաղ համագործակցել իսրայելցի գործընկերների հետ եւ նրանց առաջարկել է ողջ անհրաժեշտ աջակցությունը՝ վիրավորներին օգնելու եւ այդ հրեշավոր հանցագործությունն իրականացնողներին պատասխանատվության ենթարկելու հարցում»,-ասվում է Սպիտակ տան մամուլի քարտուղար Կարին Ժան Պիեռի հայտարարության մեջ:
Նա ուշադրություն է հրավիրել այն հանգամանքի վրա, որ ահաբեկչությունը տեղի է ունեցել Հոլոքոստի զոհերի հիշատակի միջազգային օրը։
Ուրբաթ երեկոյան Իսրայելի ոստիկանությունը հաղորդել է Արեւելյան Երուսաղեմում սինագոգի մոտ տեղի ունեցած ահաբեկչության մասին: Տեղական ԶԼՄ-ները հայտնել են, որ Նեվե Յակով շրջանում հրաձգության հետեւանքով առնվազն 8 մարդ է զոհվել, 10-ը՝ վիրավորվել։
Նիկոլ Փաշինյանը պատմել է, թե ինչու է որոշել սափրվել 
