Նախորդ գիշեր Հայաստան է ժամանել ԱՄՆ Խաղաղության կորպուսիկամավորների 28-րդ խումբը։ Այս մասին  հաղորդում են ԱՄՆ դեսպանատնից:

Տասնվեց ամերիկացի կամավոր երկու տարի կապրի Հայաստանի տարբեր մարզերում եւ կծառայի ի շահ հայ ժողովրդի։


Սա Հայաստան ժամանող կամավորների առաջին խումբն է 2020թ-ից ի վեր, երբ կամավորները ստիպված էին հեռանալ Հայաստանից COVID-19 համավարակի պատճառով։ Այդ ժամանակից մինչ օրս Խաղաղության կորպուսի անձնակազմը եւ նախկին կամավորները շարունակել են իրենց աշխատանքը դպրոցների եւ համայնքային խմբերի հետ՝ իրականացնելով տարբեր առցանց ծրագրեր եւ դասընթացներ։

«Մենք շատ ոգեւորված ենք, որ առիթ ունենք ականատես լինելու կամավորների պատմական վերադարձին Հայաստան,-ասել է Խաղաղության կորպուսի հայաստանյան գրասենյակի տնօրեն Ջոան Ֆեյրլին։ «Ես գիտեմ, որ կամավորները կծառայեն մեծ խանդավառությամբ ու եռանդով, եւ վստահ եմ, որ հայ եւ ամերիկացի ժողովուրդների միջեւ համագործակցության նոր հնարավորություններ եւ ամուր բարեկամություն կհաստատվի»։

Ըստ Հայաստանի կառավարության հետ ունեցած համաձայնության՝ կամավորները կաշխատեն Հայաստանի տարբեր մարզերի դպրոցներում եւ հասարակական կազմակերպություններում իրենց հայ գործընկերների հետ միասին։ Նրանք կօգնեն անգլերենի ուսուցիչներին եւ աշակերտներին բարելավել անգլերենի հմտությունները, ինչպես նաեւ կաշխատեն երիտասարդների հետ՝ նրանց զինելով անհրաժեշտ գիտելիքներով եւ հմտություններով՝ ի նպաստ Հայաստանի համայնքների զարգացման։

ԱՄՆ Խաղաղության կորպուսի մասին

Խաղաղության կորպուսը ամերիկացի կամավորներից, հյուրընկալող երկրի գործընկերներից, Խաղաղության կորպուսի անձնակազմից եւ համայնքի անդամներից բաղկացած՝ ծառայության միջազգային ցանց է, որի առաքելությունն աշխարհում խաղաղության ու բարեկամության ամրապնդումն է։ ։ Աշխարհի տարբեր երկրների կառավարությունների հրավերով՝ Խաղաղության կորպուսի կամավորները աշխատում են համայնքի անդամների կողքին՝ օգնելով նրանց իրականացնել տեղական առաջնահերթություն ունեցող ծրագրեր։

1961թ․-ից ի վեր, ինչ Ջոն Ֆ․ Քենեդին հիմնել է ԱՄՆ Խաղաղության կորպուսը, ավելի քան 240,000 ամերիկացի է ծառայել աշխարհի 142 երկրում։

ԱՄՆ Խաղաղության կորպուսի հայաստանյան գրասենյակի մասին

Խաղաղության կորպուսը գործում է Հայաստանում 1992թ․-ից սկսած ՝ Հայաստանի կառավարության հրավերով։ Խաղաղության կորպուսը նպաստել է երկու՝ հայ եւ ամերիկացի ժողովուրդների միջեւ բարեկամության ամրապնդմանը, ինչպես նաեւ կրթության եւ երիտասարդության ոլորտների զարգացմանը։ Խաղաղության կորպուսի կամավորները հայ ժողովրդի հետ կիսվել են իրենց մշակույթով, ինչպես նաեւ ներկայացրել հայկական մշակույթը ԱՄՆ-ի իրենց համայնքներում։

Հայաստանում ծառայել է Խաղաղության կորպուսի ավելի քան 1,100 կամավոր։