Ֆրանսիայի Ազգային ժողովի պատգամավորները բացարձակ մեծամասնությամբ քվեարկել են Հոլոդոմորը ուկրաինացի ժողովրդի ցեղասպանություն ճանաչելու բանաձեւի օգտին: Այս մասին ասվում է Ֆրանսիայի խորհրդարանի ստորին պալատի կայքում։ Որոշմանը կողմ է քվեարկել 168 օրենսդիր, դեմ՝ միայն երկուսը։
Ինչպես նշվում է փաստաթղթի տեքստում, արհեստական պատճառներով առաջացած սովը, որը բռնկվել էր 1930-ականների սկզբին ԽՍՀՄ մի շարք գյուղատնտեսական շրջաններում, Ուկրաինայում առանձնահատուկ մասշտաբներ ուներ։
«Շնորհակալ եմ Ֆրանսիայի ծանրակշիռ ներդրման համար տոտալիտար Ռուսաստանի անցյալի եւ ներկա հանցագործությունների բացահայտման, ճշմարտության, արդարության եւ, հետեւաբար, պատասխանատվության հաստատման գործում: Շնորհակալություն, Ֆրանսիա»,-Twitter-ի իր էջում ֆրանսերենով եւ անգլերենով Ֆրանսիայի Ազգային ժողովի որոշումը մեկնաբանել է Ուկրաինայի նախագահ Վլադիմիր Զելենսկին:
Ավելի վաղ՝ 2022 թվականի նոյեմբերի 30-ին, Բունդեսթագը Հոլոդոմորը ճանաչել էր ուկրաինացի ժողովրդի ցեղասպանություն։ 2022 թվականի դեկտեմբերի 15-ին նմանատիպ բանաձեւ է ընդունել նաեւ Եվրախորհրդարանը։
Հոլոդոմորը խոշոր վիճելի թեմա է Ուկրաինայի եւ Ռուսաստանի միջեւ։ Մոսկվան մերժում է Կիեւի այն տեսակետը, ըստ որի՝ Իոսիֆ Ստալինի կառավարման տարիներին ԽՍՀՄ-ում գյուղատնտեսության բռնի կոլեկտիվացման հետեւանքով առաջացած զանգվածային սովի զոհերը եղել են միայն ուկրաինացիները, եւ հայտարարում է, որ սովից տուժել են նաեւ Կենտրոնական Ասիայի եւ Ռուսաստանի միլիոնավոր բնակիչներ:
«Ուղեւորից ուղեվարձ ես ուզում, ասում են՝ գնա Նիկոլից ուզի». Վարորդները գործադուլ են անում 
