ՀՀ-ի համար ըմբռնելի է էքսկլավ, անկլավների հարցն ավելի ուշ դիտարկելու մոտեցումը

Հայաստանի Հանրապետության համար ըմբռնելի է էքսկլավ, անկլավների հարցն ավելի ուշ դիտարկելու մոտեցումը։ Sputnik Արմենիայի հարցմանն ի պատասխան՝ հայտնել են ՀՀ փոխվարչապետ Մհեր Գրիգորյանի գրասենյակից։ Շեշտվում է, որ այս դեպքում ևս որպես ելակետ պետք է ունենալ դե յուրե իրավական ուժ ունեցող փաստաթղթերի հիման վրա տարածքները սահմանազատելու և սահմանագծելու մոտեցումը:

Մեր թղթակիցը հետաքրքրվել էր, թե ինչպես է փոխվարչապետի գրասենյակը գնահատում Ադրբեջանի փոխվարչապետ Շահին Մուստաֆաևի գրասենյակի հայտարարությունը, թե, այսպես կոչված, էքսկլավային գյուղերի պատկանելությունն անվիճելի է, և դրանք պետք է անհապաղ «ազատագրվեն»։

Գրիգորյանի գրասենյակից հայտնում են, որ Հայաստանի Հանրապետությունը հավակնություններ չունի իր միջազգայնորեն ճանաչված տարածքից դուրս որևէ տարածքի նկատմամբ, բայց նաև չի կարող սեփական ինքնիշխան տարածքը հանձնել:

«Խնդրո առարկա հատվածներում անհրաժեշտ է տեղորոշել, թե որտեղ է սկսվում Հայաստանի Հանրապետության տարածքը, և այդ տեղորոշումը պետք է իրականացվի իրավական ուժ ունեցող փաստաթղթերի հիման վրա, և ըստ այդմ դե յուրե Հայաստանի Հանրապետության տարածքը պետք է լինի Հայաստանի Հանրապետության տնօրինության և վերահսկողության ներքո, իսկ Ադրբեջանական Հանրապետության տարածքը՝ Ադրբեջանական Հանրապետության տնօրինության և վերահսկողության ներքո։ Վարչապետ Փաշինյանը նշել է, որ սահմանի ողջ երկայնքով Հայաստանի Հանրապետությունը պատրաստ է գնալ նման լուծումների»,- նշված է պատասխանում:

Ըստ փոխվարչապետի գրասենյակի՝ ՀՀ-ն պատրաստ է նույն բանաձևով լուծումների գնալ նաև Տավուշի մարզին հարակից ամենախնդրահարույց տարածքներում:

Անդրադառնալով հանձնաժողովների աշխատանքին նշվում է, որ երկու երկրների կողմից հաստատված աշխատակարգի համաձայն՝ հանդիպումների արդյունքում հրապարակվում են պաշտոնական մամուլի հաղորդագրություններ, որոնցից դուրս պարզաբանումներ կամ մեկնաբանություններ չեն թույլատրվում:

Հիշեցնենք, որ մարտի 12-ին կայացած մամուլի ասուլիսի ժամանակ ՀՀ վարչապետ Նիկոլ Փաշինյանը հայտարարել էր, որ Երևանը նախատեսում է ճանապարհների նոր հատվածներ կառուցել այն ճանապարհների փոխարեն, որոնք դուրս են գալիս Հայկական ԽՍՀ սահմաններից: Մասնավորապես, նա մատնանշել է Տավուշի մարզի Ոսկեպար գյուղի մոտակայքում գտնվող Երևան-Թբիլիսի ճանապարհահատվածը։ Ընդհանուր առմամբ, ըստ վարչապետի, ԽՍՀՄ փլուզման ժամանակ արձանագրված սահմանները, ըստ Ալմա-Աթայի հռչակագրի և Պրահայի հայտարարության, հիմք են ընդունվել երկու երկրների տարածքային ամբողջականության փոխադարձ ճանաչման համար: