Թուրքիայի նախագահ Ռեջեփ Թայիփ Էրդողանը կիրակի օրը հայտարարել է, որ Միացյալ Նահանգները և եվրոպական երկրները բավականաչափ ջանքեր չեն գործադրում Իսրայելին ստիպելու համաձայնել Գազայում կրակի դադարեցմանը այն բանից հետո, երբ պաղեստինյան ՀԱՄԱՍ խմբավորումն ընդունել է հրադադարի առաջարկը, հաղորդում են թուրքական լրատվամիջոցները:
Ստամբուլում մուսուլման գիտնականների առջև ելույթի ժամանակ Էրդողանն ասել է, որ ՀԱՄԱՍ-ն ընդունել է Քաթարի և Եգիպտոսի հրադադարի առաջարկը, որը դարձել է «քայլ դեպի կայուն հրադադար», սակայն Իսրայելի վարչապետ Բենիամին Նաթանյահուի կառավարությունը չի ցանկանում, որ պատերազմն ավարտվի։.
«Նաթանյահուի կառավարության պատասխանը Ռաֆահում անմեղ մարդկանց վրա հարձակվելն էր, - ասել է նա:- Պարզ դարձավ, թե ում կողմն է խաղաղությունն ու երկխոսությունը, և ովքեր են ցանկանում բախումների շարունակում և ավելի մեծ արյունահեղություն»:
«Իսկ Նաթանյահուն տեսե՞լ է որևէ լուրջ արձագանք իր այլասերված պահվածքին: Ոչ։ Ոչ Եվրոպան, ոչ Ամերիկան այնպիսի արձագանք չցուցաբերեցին, որն Իսրայելին զինադադար կպարտադրեր»,- հավելել է Էրդողանը։
Անկարան ուրբաթ օրը ողջունել է ՄԱԿ-ի Գլխավոր ասամբլեայի աջակցությունը Պաղեստինի՝ ՄԱԿ-ին անդամակցելու հայտին: Կիրակի օրը Էրդողանը կոչ է արել այն երկրներին, որոնք չեն ճանաչում Պաղեստինի ինքնիշխան պետությունը, դա անել քվեարկությունից հետո, և քննադատել է Վաշինգտոնին և մյուս երկրներին, որոնք դեմ են քվեարկել։
«Մենք տեսանք, որ երկրները, որոնք ամեն հարմար առիթով մեզ դասախոսություններ են կարդում մարդու իրավունքների և ազատությունների մասին, բացահայտորեն աջակցում են նրանց, ովքեր ոչնչացրել են Գազայի 35,000 բնակչի», - ասել է նա՝ վկայակոչելով Գազայի առողջապահության նախարարության տվյալները: «Մենք տեսանք, որ նրանք, ովքեր մինչև երեկ սուրբ էին համարում բողոքի ցույցերի իրավունքը, չեն կարողանում հանդուրժել Պաղեստինին աջակցող ցույցերը»:
«Ուղեւորից ուղեվարձ ես ուզում, ասում են՝ գնա Նիկոլից ուզի». Վարորդները գործադուլ են անում 
