Կա 50% հավանականություն, որ մեր գալակտիկան՝ Ծիր Կաթինը, մոտակա 10 միլիարդ տարվա ընթացքում կբախվի հարեւան Անդրոմեդա գալակտիկայի հետ: Այս եզրակացությանն է հանգել Ֆինլանդիայի, Ֆրանսիայի և Մեծ Բրիտանիայի գիտնականների միջազգային խումբը: Նրանք իրենց տվյալները հրապարակել են arXiv պորտալում, որտեղ տեղակայված են ոչ գրախոսվող գիտական հոդվածներ։
Անդրոմեդա գալակտիկան, որը գտնվում է Ծիր Կաթինից 2,5 միլիոն լուսային տարի հեռավորության վրա, դանդաղ մոտենում է մեզ՝ վայրկյանում 110 կիլոմետր արագությամբ։ Երկար ժամանակ աստղագետները կարծում էին, որ մեր գալակտիկաներն անխուսափելիորեն կբախվեն և ի վերջո կմիավորվեն՝ ձևավորելով նոր, միասնական գալակտիկական համակարգ:
Սակայն նոր հետազոտությունները ցույց են տալիս, որ նման սցենարն անխուսափելի չէ։ Գիտնականները նշել են, որ բոլոր գալակտիկաների ներկայիս դիրքերի, տեղաշարժերի և զանգվածների վերաբերյալ տվյալների անորոշությունը տեղ է թողնում տարբեր արդյունքների համար: Մասնավորապես, հավանականությունը, որ Ծիր Կաթինի և Անդրոմեդայի միաձուլումը տեղի չի ունենա, մոտ 50% է:
Հետազոտողները նաև նշել են, որ նախորդ մոդելները հաշվի չեն առել մի կարևոր գործոն՝ փոքր գալակտիկաների գրավիտացիոն ազդեցությունը Տեղական խմբի ներսում, որին պատկանում են և՛ Ծիր Կաթինը, և՛ Անդրոմեդան: Այս ազդեցությունը կարող է փոխել գալակտիկաների հետագծերը և կանխել դրանց բախումը:
Իրենց հաշվարկների համար գիտնականներն օգտագործել են Gaia և Hubble տիեզերական աստղադիտակների միջոցով ստացված տվյալները: Նրանք գնահատել են Տեղական խմբի չորս ամենամեծ գալակտիկաների զանգվածները, արագությունները և գրավիտացիոն փոխազդեցությունները՝ Ծիր Կաթին, Անդրոմեդա, Եռանկյուն գալակտիկա և Մագելանի Մեծ ամպ: Այդ տվյալները այնուհետև մուտքագրվեցին համակարգչային մոդելի մեջ, որը ցույց տվեց ապագա զարգացումների հնարավոր սցենարները:
Այսպիսով, Ծիր Կաթինի և Անդրոմեդայի բախման հավանականությունը կարելի է համեմատել մետաղադրամ նետելու հետ։ Եթե միաձուլումն իսկապես տեղի ունենա, ապա դա կլինի ոչ շուտ, քան 8 միլիարդ տարի հետո:
