Համայնքապետը կամ քաղաքապետը կարող են համայնքի տրանսպորտին վերաբերող հարցերը կարգավորել հատուկ հանձնաժողովի քննարկումներն ու առաջարկները լսելուց հետո: Սակայն Երևանի քաղաքապետ Տարոն Մարգարյանն ինքնակոչ ներկայացնում է իրեն ձեռնտու գինը և հաստատում այն: Այսօր լրագրողների հետ հանդիպման ժամանակ այսպիսի գնահատական տվեց Հասարակական պաշտպանների միության նախագահ Արամ Գրիգորյանը: Նրա դիտարկմամբ` քաղաքապետ Տարոն Մարգարյանը երկրորդ անգամ հայտարարեց սակագնի բարձրացման մասին, քանի որ առաջին անգամ նրա համար անսպասելի պոռթկում եղավ ժողովրդի կողմից: «Քաղաքապետն իր համար նպատակահարմար ձև է գտել` գինն ասենք, եթե մնա ժողովրդի մեջ, կթողնենք անփոփոխ: Սակայն պետք է ընդունել, որ նրանք ամեն ձևով պատրաստվել են, անգամ շոուբիզնեսի ներկայացուցիչներին են համոզել ոտքի չկանգնել և նախորդ անգամվա պես ակտիվություն չդրսևորել»,- նշեց Գրիգորյանը, ով նաև անդրադարձավ քաղաքապետարանի կողմից վերջերս ստեղծված այն հանրձնաժողովին, որը պետք է հանրային կարծիք ստեղծի: «Մարդիկ գնում են հանձնաժողովին մասնակցելու, հարցնում ենք` ինչու ես գնում, ասում է` չգիտեմ, դեռ ոչինչ պարզ չի: Փաստորեն` ստեղծվել է ոչինչ իրենից չներկայացնող խումբ, որում ընդգրկված են մարդիկ, ովքեր չպետք է լինեն, և քննարկում են հարցեր, որոնց մասին ոչինչ հայտնի չէ: Հանձնաժողովը ոչ մի իրավական հիմք չունի սակագին որոշելու համար, սակագնի որոշումը պետք է օրինական լինի»,- տեղեկացրեց Գրիգորյանը` հավելելով, որ ցանկացած հանձնաժողով պետք է հավասար ներկայացուցիչներ ունենա` ներգրավված թե հանրության կողմից, թե քաղաքապետարանի:
Քաղաքացի Արգիշտի Կիվիրյանն էլ համոզված է, որ ստեղծված խումբը պարզապես շղարշ գցելու համար է, որպեսզի հանրությունը մտածի, թե որոշումը Տարոն Մարգարյանի կամային ցանկություններից չի բխում: «Ինչու՞ քաղաքապետը կասեցրեց իր որոշումը: Պատասխանը միանշանակ պարզ է` հերթական իմիտացիոն քայլն էր: Մեզ մնում է միայն հուսալ, որ ժողովուրդը ևս մեկ անգամ կպաշտպանի իր շահերը և ավելի մեծ թափով ոտքի կկանգնի»,- ասաց Կիվիրյանը:
Իսկ քաղաքացի Անի Կաղինյանն էլ համոզված է, որ ստեղծված հանձնաժողովն ապօրինի է, և նախապես հայտարարված հանրային լսումներն այդպես էլ չանկցկացվեցին: «Մենք ստեղծելու ենք անկախ փորձագետների հանձնաժողով, որում կլինեն մասնագիտական կարծիքներ: Եվ հրավիրելու ենք ներկայացուցիչների կառավարությունից, քաղաքապետարանից, ինչպես նաև կլինեն միջազգային ներկայացուցիչներ: Եվ կնշեմ նաև, որ քաղաքապետարանի կողմից ստեղծված հանձնաժողովը պետք է չափորոշիչներ որոշեր, և դա չի կարող լինել հանձնաժողովի նիստ»,- նշեց Կաղինյանը` տեղեկացնելով, որ հաջորդ ուրբաթ մասնագիտական հանձնաժողովի կողմից տեղի կունենան հանրային լսումներ: