Ուրբաթ օրվանից հոսպիտալացված Հռոմի պապ Ֆրանցիսկոսի կլինիկական պատկերը բարդ է, և նա շարունակում է մնալ հիվանդանոցում։ Այս մասին հայտնում է Սուրբ Աթոռի մամուլի ծառայությունը։

«Վերջին օրերին և այսօր կատարված թեստերի արդյունքները բացահայտել են շնչուղիների պոլիմանրէային վարակ, ինչը հանգեցրել է թերապիայի հետագա փոփոխության։ Մինչ օրս կատարված բոլոր ուսումնասիրությունները վկայում են բարդ կլինիկական պատկերի մասին, որը կպահանջի համարժեք հիվանդանոցային բուժում»,- ասվում է հաղորդագրությունում։


Ուրբաթ օրը, ընդունելությունից հետո, 88-ամյա Ֆրանցիսկոս պապը գնացել է Հռոմի Gemelli հիվանդանոց՝ հետազոտվելու և հիվանդանոցային պայմաններում բրոնխիտի բուժումը շարունակելու համար: Պոնտիֆիկոսի մասնակցությամբ միջոցառումները չեղարկվել են մինչև երկուշաբթի: