ԱՄՆ պաշտպանության նախարարությունը նախատեսում է Կուբայում գտնվող Գուանտանամոյի ռազմաբազայում գտնվող զորքերի թիվը կիսով չափ կրճատել՝ հասցնելով 450-ի, քանի որ այնտեղից դուրս են բերվել բոլոր անօրինական ներգաղթյալները: Այս մասին հայտնել է Associated Press-ը՝ հղում կատարելով աղբյուրներին։
Մոտ 900 զինծառայող, այդ թվում՝ 170 ԱՄՆ ծովային հետեւակային, ներգրավված են եղել ԱՄՆ նախագահ Դոնալդ Թրամփի՝ Կուբայի Գուանտանամոյի բանտում գտնվող միգրանտների կալանավայրը ընդլայնելու ծրագրում՝ մինչեւ 30 հազար մարդ տեղավորելու համար: Սակայն նախաձեռնությունը կանգ է առել իրավական եւ նյութատեխնիկական դժվարությունների պատճառով: Հիմնական խնդիրը միգրանտների տեղափոխման ֆինանսական մեծ ծախսերն են։ Նրանց ուղարկում էին Գուանտանամո ինքնաթիռով՝ երբեմն օգտագործելով ռազմական ինքնաթիռներ, ինչն էլ ավելի բարձրացնում էր տեղափոխման արժեքը։
Ամերիկացի պաշտոնյաների խոսքով՝ Թրամփի ծրագիրը, ամենայն հավանականությամբ, կվերանայվի, քանի որ ավելի շահավետ է օգտագործել այլ ռազմաբազաներ, ինչպիսին է Տեխասի Ֆորտ Բլիսը՝ միգրանտներին պահելու համար։
