Կոլումբիայի իշխանությունները երկուշաբթի ազատ են արձակել Մեդելինի կարտելի նախկին ղեկավար Կառլոս Լեհդերին այն բանից հետո, երբ դատավորը վճռել է, որ 75-ամյա քաղաքացու՝ Կոլումբիայում թմրամիջոցների ապօրինի շրջանառության համար պատժի ժամկետը լրացել է, հաղորդում է CBS News-ը:
Լեհդերը՝ «կոկաինային կովբոյներից» մեկը և Պաբլո Էսկոբարի համախոհը, ձերբակալվել է ուրբաթ երեկոյան՝ Գերմանիայից Բոգոտայի օդանավակայանում վայրէջք կատարելուց անմիջապես հետո։
Ներգաղթի պաշտոնյաները հայտնել են, որ նա շարունակում է հետախուզվել հարավամերիկյան երկրում թմրանյութերի ապօրինի շրջանառության և զենքի մաքսանենգության մեղադրանքով:
Լեհդերը դարձել է առաջին կոլումբիացի թմրավաճառը, ով արտահանձնվել է ԱՄՆ այն բանից հետո, երբ նրան ձերբակալել են իր ռանչոյում երեկույթի ժամանակ:
Նախկին թմրավաճառը 1987 թվականին արտահանձնվել է ԱՄՆ, որտեղ նա բանտում է անցկացրել ավելի քան 30 տարի։ 2020 թվականին Լեհդերն ազատ է արձակվել՝ պատժի երկու երրորդը կրելուց հետո Միացյալ Նահանգներում։ Նրան արտաքսել են Գերմանիա, որի քաղաքացին է նաև։
Նա ապաքինվում է քաղցկեղից և տառապում է արյան բարձր ճնշումից, ասել է նրա փաստաբանը։
Կոլումբիայի իշխանությունները Լեհերին դատապարտել են թմրանյութերի ապօրինի շրջանառության համար 1995 թվականին, երբ նա պատիժ էր կրում ԱՄՆ բանտում մեկ այլ մեղադրանքով: Կարտելի առաջնորդը Կոլումբիայում դատապարտվել է 24 տարվա ազատազրկման, ինչը նշանակում է, որ նրա պատժի ժամկետը լրացել է 2019 թվականին, համաձայն կոլումբիական օրենքի։
1920-ականներին Կոլումբիա ժամանած գերմանացի ներգաղթյալի որդին՝ Լեհդերն իր հանցավոր կարիերան սկսել է 1970-ականներին՝ ապրելով Նյու Յորքում հարազատների հետ:
Օգտագործելով իր կապերն ու անգլերենի իմացությունը՝ նա կոկաինի շուկաներ է բացել Մեդելինի կարտելի համար և դարձել նրա ղեկավար Էսկոբարի գլխավոր դաշնակիցը: Netflix-ի Narcos սերիալում նա ներկայացվում է որպես վայրենի, անողոք հանցագործ, ով ղեկավարում է կոկաինի տարանցիկ հանգույց Բահամյան կղզիներում, որը կոչվում է Norman's Cay, որը դարձել է կոկաինի առաքման հիմնական վայր:
Կոլումբիայում նա ուներ մի շքեղ գյուղական հյուրանոց՝ Posada Alemana, որի տարածքում կային վանդակի մեջ գտնվող առյուծներ և Լեհդերի սիրելի երաժիշտ Ջոն Լենոնի մեծ արձանը։
Միացյալ Նահանգներում Լեհդերն ի սկզբանե դատապարտվել է ցմահ ազատազրկման, սակայն կարողացել է կրճատել իր պատժաչափը՝ ամերիկացի քննիչներին տրամադրելով տեղեկություններ, որոնք օգտագործվել են Պանամայի առաջնորդ Մանուել Նորիեգային հետապնդելու համար:
