Իսրայելի վարչապետ Բենիամին Նեթանյահուն հինգշաբթի օրը գովաբանել է Հունգարիայի վարչապետ Վիկտոր Օրբանին Միջազգային քրեական դատարանից դուրս գալու համար՝ որակելով այս քայլը որպես «համարձակ և սկզբունքային որոշում»:
«Շատ կարևոր է դիմակայել այս կոռումպացված կազմակերպությանը», – ասել է Նեթանյահուն՝ հավելելով, որ նա կարծում է, որ Հունգարիան առաջինն էր մի շարք պետություններից, որոնք դուրս են գալու «այս կոռումպացված և փտած կառույցից», հաղորդում է The Times of Israel-ը:
Նշենք, որ Օրբանի կողմից Նեթանյահուին ընդունելուց րոպեներ առաջ Հունգարիան հայտարարեց, որ դուրս է գալիս ՄՔԴ-ից, որը նոյեմբերին Իսրայելի վարչապետի ձերբակալության օրդեր էր արձակել:
«Դուրս գալու գործընթացը կսկսվի հինգշաբթի օրը՝ Հունգարիայի սահմանադրական և միջազգային իրավական պարտավորություններին համապատասխան», – ասել է Օրբանի խոսնակ Զոլթան Կովաչը։
Օրբանը նշել է, որ այն դարձել է «քաղաքական դատարան»:
«Եթե դատարանները առաջնորդվում են քաղաքական նկատառումներով, ապա ժողովրդավար պետությունները չեն կարող մասնակցել դրան»,- հավելել է նա:
