Ռուսաստանի նախագահ Վլադիմիր Պուտինի և ԱՄՆ նախագահ Դոնալդ Թրամփի միջև առաջիկա օրերին հեռախոսազրույց չի նախատեսվում, լրագրողներին ասել է Կրեմլի մամուլի ծառայության ղեկավար Դմիտրի Պեսկովը, գրում է Коммерсант-ը։
«Ժամանակացույցում դեռ ոչինչ չկա»,- մամուլի ասուլիսի ժամանակ ասել է Դմիտրի Պեսկովը։
ՌԴ նախագահի մամուլի ծառայության ղեկավարը չի մեկնաբանել նաեւ NBC-ի այն լուրերը, թե Թրամփի խորհրդականները խորհուրդ են տալիս հրաժարվել ՌԴ նախագահին զանգահարելուց, քանի դեռ Մոսկվան չի հայտարարել Ուկրաինայում կրակի ամբողջական դադարեցման մասին։
«Մեր օրերում լրատվամիջոցներում բազմաթիվ կեղծիքներ, ասեկոսեներ, ենթադրություններ և բացահայտ սուտեր են հրապարակվում »,- ասել է Կրեմլի խոսնակը։
Նա հավելել է, որ Ռուսաստանն ու ԱՄՆ-ը բանակցում են ուկրաինական ճգնաժամի կարգավորման «նյուանսների» շուրջ, որոնք ավելի վաղ հնչեցրել էր Վլադիմիր Պուտինը։
Ռուսաստանի և ԱՄՆ նախագահների առաջին հեռախոսազրույցը տեղի է ունեցել փետրվարի 12-ին, Պուտինի և Թրամփի երկրորդ զրույցը տեղի է ունեցել մարտի 18-ին։
