Բոլորի հայացքներն ուղղված են ապագային. Թուրքիան պատրաստվում է դնել Կարս-Իգդիր-Արալըք-Դիլուջու երկաթուղային գծի հիմքը, որը կդառնա այսպես կոչված «Զանգեզուրի միջանցքի» մի մասը, հաղորդում է CNN Turk-ը։
Թուրքիայի տրանսպորտի և ենթակառուցվածքների նախարար Աբդուլքադիր Ուրալօղլուն հայտարարել է, որ արարողությունը տեղի կունենա օգոստոսի 22-ին։ Նոր գիծը կունենա մոտ 224 կիլոմետր երկարություն։
Այն բաղկացած կլինի երկու երկաթուղուց՝ էլեկտրաֆիկացմամբ և ժամանակակից ազդանշանային համակարգերով, և դրա տարողունակությունը նախատեսված է տարեկան 5,5 միլիոն ուղևոր և 15 միլիոն տոննա բեռ տեղափոխելու համար։ Նախագիծը ներառում է բարդ ինժեներական կառույցներ՝ հինգ թունել, կամուրջներ, ուղեկամուրջներ և տասնյակ անցումներ։
Շինարարության ընդհանուր արժեքը գնահատվում է մոտավորապես 110 միլիարդ թուրքական լիրա, որի մի մասը ապահովված է 2,4 միլիարդ եվրո արտաքին վարկով։ Գիծը նախատեսվում է շահագործման հանձնել մինչև 2029 թվականի վերջը։
«Զանգեզուրի միջանցքը» համարվում է ռազմավարական տրանսպորտային զարկերակ, որը Նախիջևանի միջոցով կապում է Ադրբեջանը Թուրքիայի հետ և ապահովում է ելք դեպի եվրասիական երթուղիներ։ Նախագծի իրականացումը պետք է ամրապնդի Թուրքիայի դիրքերը որպես հիմնական լոգիստիկ կենտրոն, բարձրացնի Ասիայի և Եվրոպայի միջև բեռնափոխադրումների արդյունավետությունը և տարածաշրջանին հաղորդի լրացուցիչ աշխարհաքաղաքական նշանակություն, գրում են թուրքական լրատվամիջոցները։
Սանդրո Պերկովիչ․ Այս հաղթանակը շատ կարեւոր էր (տեսանյութ) 
