ԱՄՆ նախագահ Դոնալդ Թրամփը հայտարարել է, որ Սպիտակ տան տարածքում սկսվել է պարահանդեսային դահլիճի շինարարությունը։ NBC News-ը հաղորդում է, որ շենքի մի մասը քանդվում է այդ նպատակով։
Սպիտակ տան արևելյան թևի մի մասի քանդման աշխատանքները, որպես Թրամփի նախագծի մաս, սկսվել են երկուշաբթի՝ հոկտեմբերի 20-ին։ Այս մասին լրատվամիջոցներին սկզբում հայտնել է վարչակազմի խոսնակը, և շուտով հրապարակայնորեն հաստատել է նաև ԱՄՆ նախագահը։
«Ես ուրախ եմ հայտարարել, որ Սպիտակ տան տարածքում սկսվել է նոր, մեծ և գեղեցիկ պարահանդեսային դահլիճի շինարարությունը։ Արևելյան թևը, որը լիովին անջատ է Սպիտակ տնից, ամբողջությամբ արդիականացվում է այս գործընթացի շրջանակներում և ավարտվելուց հետո ավելի գեղեցիկ կլինի», - գրել է Թրամփը։
Նա հավելել է, որ ավելի քան 150 տարի «յուրաքանչյուր նախագահ երազել է Սպիտակ տան պարահանդեսային դահլիճի մասին», որտեղ կանցկացվեն գալա ընդունելություններ, պետական այցեր և այլն։
«Ես խորապես պատիվ եմ համարում լինել առաջին նախագահը, որը վերջապես իրականացրեց այս խիստ անհրաժեշտ նախագիծը՝ առանց ամերիկացի հարկատուի համար որևէ ծախսի», - ընդգծեց ԱՄՆ նախագահը։
Նա ասաց, որ Սպիտակ տան պարահանդեսային դահլիճը մասնավոր կերպով ֆինանսավորվում է «շատ առատաձեռն հայրենասերների, մեծ ամերիկյան ընկերությունների և, ամենախիստ խոնարհությամբ, ձեր կողմից»։
«Այս պարահանդեսային դահլիճը ուրախալի վայր կլինի գալիք սերունդների համար», - եզրափակեց Թրամփը։
Մեսին՝ ՄԼՍ-ի ավարտված կանոնավոր առաջնության լավագույն ռմբարկու (տեսանյութ) 
