Դիլիջանում քաղաքային արվեստի նոր ինստալյացիաներ են տեղադրվել

Դիլիջանում տեղադրվել է քաղաքային արվեստի երեք ինստալյացիա՝ «Common Senses» արվեստի ռեզիդենցիայի շրջանակներում, որը նախաձեռնել են «Dilijan Space» հետազոտական ​​և մշակութային կենտրոնը, Դիլիջանի զարգացման հիմնադրամը և UWC Dilijan միջազգային դպրոցը։ Այժմ աշխատանքներ են տարվում չորրորդ ինստալյացիայի տեղադրման ուղղությամբ։ Յուրաքանչյուր ինստալյացիա նվիրված է քաղաքի որոշակի թաղամասի՝ արտացոլելով այդ տարածքի ընկալումը բնակիչների կողմից։ Ինստալյացիաները տեղակայված են բաց հանրային տարածքներում՝ դառնալով Դիլիջանի մշակութային լանդշաֆտի մի մասը։

Արվեստի ինստալյացիա I. Պատմական Դիլիջան – «Շաբակ»

Առաջին ինստալյացիան, որը տեղակայված է «Toon Armeni» հյուրատնային համալիրի տարածքում, նվիրված է պատմական Դիլիջանին։ Այն հեղինակել է նկարիչ, Դիլիջանի երկրագիտական թանգարան-պատկերասրահի տնօրեն Արման Բադեյանը։ Արեստագետը ներկայացրել է փայտի, քարի և վիտրաժային ապակու օգտագործմամբ խառը տեխնիկայով պատրաստված 6 օբյեկտների շարք, որոնք հատկապես տպավորիչ են արևի ճառագայթների տակ: Կոմպոզիցիայի կենտրոնական պատկերը շաբակն է՝ փայտե պատշգամբի ճաղաշարի ավանդական տարրը, որն առանձնահատկություն է հաղորդում Դիլիջանի ճարտարապետությանը: Շաբակը համարվում է պատմական Դիլիջանի տեսողական կոդ՝ խորհրդանշելով ոչ միայն նրա ճարտարապետական ​​առանձնահատկությունները, այլև քաղաքի մնայուն մշակութային հիշողությունը։

Արվեստի օբյեկտ II. «Գիրք» – Հոգևորականություն և մշակույթների երկխոսություն Պապանինոյում

Երկրորդ օբյեկտը տեղադրվել է UWC Դիլիջանի միջազգային դպրոցի տարածքում և նվիրված է Պապանինո շրջանին՝ Սլոբոդկայի նախկին մոլոկանական գյուղին, որտեղ հայերն ու մոլոկանները պատմականորեն համակեցության մեջ են եղել: Հեղինակները՝ Նիժնի Նովգորոդից ժամանած նկարիչներ Սաշա Վոլոդինան և Կիրիլ Պերնատկինը, իրենց գաղափարն իրականացրել են ապակե տարրով միացված երկու երկաթբետոնե սալերի տեսքով, որոնք նման են բաց գրքի: Թափանցիկ կառուցվածքի միջով անցնող արևի լույսը օբյեկտին հաղորդում է խորհրդանշական բովանդակություն։

Սալերի ներսի կողմերում փորագրված են Պապանինոյի համայնքների մասին տեքստեր երկու լեզվով՝ հայերեն և ռուսերեն։

Գեղարվեստական ​​աշխատանք III. «Աչք», հայացք Թախտա շրջանի անցյալին

Ռեժիսոր և նկարիչ Քսենյա Էլյանի կողմից ստեղծված երրորդ գեղարվեստական ​​աշխատանքը նվիրված է Թախտա շրջանին և կոչվում է «Աչք»: Աշխատանքի հիմքում դրված է դիտարկման գաղափարը․ ժամանակին այս տեղում գտնվել է դիտակետ, որը վերահսկում էր քաղաքի մատույցները։ Գեղարվեստական ​​աշխատանքը նախագծված է որպես կիսահայելային խորանարդ, որը պարունակում է օպտիկական սարք (camera obscura): Ներսում կանգնելիս՝ մարդը տեսնում է շրջակա լանդշաֆտի պրոյեկցիան խորանարդի վրա, միևնույն ժամանակ երկու հայելային պատերը յուրահատուկ ձևով արտացոլում են արտաքին աշխարհը։ Անկյունների այս համադրությունը դիտողին հրավիրում է զգալ արտաքին և ներքին հայացքների տարբերությունը:

Գեղարվեստական ​​աշխատանք IV. Շամախյան – «Շամախյանական կատու»

Շարքը լրացնում է Հո Գուի (Մարիա Պլաքսինա և Եգոր Եֆրեմով) ստեղծագործական զույգի ստեղծած աշխատանքը՝ ոգեշնչված Շամախյան շրջանից: Արվեստի օբյեկտը դեռ կառուցման փուլում է և իրենից ներկայացնում է տուֆից և տրավերտինից պատրաստված կատվի մռութ: Աշխատանքի գաղափարը ծնվել է տեղացի երեխաների հետ Շամախյանով հեղինակների զբոսանքների ժամանակ: Անտառի մոտիկությունը և երեխաների հետաքրքրությունը բնության նկատմամբ արտահայտվում են «կատվի» մակերեսին Շամախյանի երեխաների կողմից կատարված նկարների փորագրմամբ: Այսպիսով, աշխատանքը խորհրդանշականորեն արտացոլում է քաղաքային կյանքի և Շամախյանին բնորոշ բնության միաձուլումը:

Ինչպես նշում է «Common Sense» նախագծի համակարգող Լյուդմիլա Ստարոստովան, չնայած քաղաքային թաղամասերի հարուստ պատմությանը և բազմազանությանը, Դիլիջանն արտաքին միջավայրում իր ինքնությունը տեսանելի ու ճանաչելի դարձնելու խնդիր ունի։

«Դիլիջանի բազմազան կողմերը՝ հանգստավայրից մինչև առողջարան, խորհրդային շրջանի ստեղծագործական կենտրոններից մինչև արդյունաբերական ձեռնարկություններ, իրենց հետքն են թողել յուրաքանչյուր թաղամասի վրա։ Մենք մեր առջև խնդիր դրեցինք բացահայտել և գեղարվեստականորեն արտահայտել այս թաղամասերի անհատականությունը քաղաքային միջավայրում։ Այս տեսլականն իրականացնելու համար մենք նախաձեռնեցինք բաց մրցույթ. ստացանք 47 հայտ տարբեր երկրներից ժամանած նկարիչներից։ Ընտրական փուլից հետո մասնակիցներին հրավիրեցինք մասնակցելու արվեստի ռեզիդենցիայի, որի ընթացքում ստեղծվեցին ներկայացված արվեստի գործերը։ Այս նախագիծը ոչ միայն ներգրավեց արվեստագետների մասնագիտական ​​​​ համայնքին՝ քաղաքային տարածքը հասկանալու գործում, այլև հիմք դրեց կարևոր երկխոսության Դիլիջանի անցյալի և ներկայի միջև՝ ներգրավելով տեղի բնակիչներին։ Մենք կարողացանք ընդգծել քաղաքի թաղամասերի յուրահատկությունը և դրանց բնույթն ավելի տեսանելի դարձնել բնակիչների և այցելուների համար։ Արվեստի այս օբյեկտները դարձել են ոչ միայն քաղաքային միջավայրի զարդարանք, այլև տեղական մշակույթի և հիշողության հետ փոխազդեցության նոր միջոց», - նշեց Լյուդմիլա Ստարոստովան։

Տեղեկանք

«Դիլիջան Սփեյս»-ը Ռուբեն Վարդանյանի և Վերոնիկա Զոնաբենդի կողմից քաղաքի մշակութային, կրթական և զբոսաշրջային զարգացման նպատկով հիմնված Դիլիջանի զարգացման հիմնադրամի նախագծերից մեկն է:
«Դիլիջան Սփեյս»-ը հետազոտական ​​և մշակութային կենտրոն է, որն ուսումնասիրում և խթանում է Դիլիջանի մշակութային ժառանգությունը, պատմությունը և ճարտարապետական ​​զարգացումը: Այն կենտրոնանում է ցուցահանդեսների և միջոցառումների վրա, որոնք ուսումնասիրում են քաղաքի հարուստ պատմությունը և լուծում են ժամանակակից կյանքի մարտահրավերները: